کراچی: ایچ بی ایل پاکستان سپر لیگ کے 9 ویں ایڈیشن کی بہترین علامتی الیون منتخب کرلی گئی۔
چیمپئن سائیڈ اسلام آباد یونائیٹڈ کے شاداب خان کو کپتان مقرر کر دیا ہے،رنر اپ ملتان سلطانز کے 5 ،اسلام آباد یونائیٹڈ کے 3، پشاور زلمی کے 2اور کراچی کنگزکا ایک پلیئر جگہ بنانے میں کامیاب رہا، اس ٹیم کا انتخاب عثمان واہلہ (ڈائریکٹرانٹرنیشنل کرکٹ) کی زیرسربراہی پینل نے کیا، آزاد ارکان میں کمنٹیٹر ڈینی موریسن، مارک بوچر، عروج ممتازاورطارق سعید شامل تھے۔
25 سالہ شاداب کی کپتانی میں اسلام آباد یونائیٹڈ نے ایچ بی ایل پی ایس ایل کا تیسرا ٹائٹل جیتا،آل رائونڈ کارکردگی پرانھیں ٹورنامنٹ کا بہترین کھلاڑی قرار دیا گیا، انھوں نے 12 میچز میں 305 رنز بنائے اور 14 وکٹیں شامل رہیں۔
اسلام آباد میں شامل ان کے دیگر 2 پلیئرز عماد وسیم اور نسیم شاہ بھی منتخب ہوگئے، کندھے کی انجری سے واپس آنے والے 21 سالہ نسیم شاہ یونائیٹڈ کی کامیابی میں ایک اور اہم کردار تھے،دائیں ہاتھ کے تیزبولر نے 7.56 کی اکانومی ریٹ سے 15 وکٹیں حاصل کیں۔
ملتان سلطانز نے پیر کی شب اپنا چوتھا فائنل (2021, 2022۔ 2023۔ 2024) کھیلا اس کے 5 کھلاڑی پلیئنگ الیون میں شامل ہوئے، ان میں عثمان خان (430 رنز، 2 سنچریاں، 2ففٹیز، اسٹرائیک ریٹ 164.12)، کرس جارڈن (6 وکٹیں، 8.42 اکانومی ریٹ ) اور ڈیوڈ ویلی (15 وکٹیں، 7.46 اکانومی ریٹ) کے ساتھ 2 مقامی کھلاڑی اسامہ میر اور افتخار احمد موجود ہیں۔
