زندگی میں کبھی ہار نہیں مانی، سندھ میں اگلی حکومت ہماری ہوگی، عمران خان

لاہور: (ویب ڈیسک) پاکستان تحریک انصاف (پی ٹی آئی) کے چیئرمین اور سابق وزیر اعظم عمران خان سے سوشل میڈیا کارکنان نے زمان پارک میں ملاقات کی ہے۔
تفصیلات کے مطابق سابق وزیر اعظم عمران خان سے پارٹی کے سوشل میڈیا کارکنان نے لاہور میں ملاقات کی، ملاقات میں ملک بھر سے سوشل میڈیا کارکنان نے شرکت کی۔
اس موقع پر چیئرمین تحریک انصاف نے کہا کہ میں نے کبھی زندگی میں ہار نہیں مانی، انسان کو کسی مقصد کے لئے پیدا کیا گیا ہے، اس مقصد کو پہچانیں اور حاصل کریں۔
سابق وزیر اعظم نے کہا کہ ملکی حالات تباہی کی طرف جا رہے ہیں، جن کے ہاتھ میں باگ ڈور دی گئی ہے یہ معیشت نہیں سنبھال سکتے۔
چیئرمین پی ٹی آئی کا مزید کہنا تھا کہ ملکی مسائل کا حل نئے انتخابات ہیں، سندھ میں اگلی حکومت پاکستان تحریک انصاف بنائے گی۔

2023ء ملکی ترقی اور قوم کی خوشحالی کا سال ہوگا، آصف زرداری

کراچی: (ویب ڈیسک) سابق صدر مملکت اور صدر پاکستان پیپلز پارٹی پارلیمنٹیرینز آصف زرداری نے کہا ہے کہ یقین ہے آنے والا سال ملک کی ترقی اور قوم کی خوشحالی کا سال ہو گا۔
سماجی رابطے کی ویب سائٹ ٹوئٹر پر اپنے پیغام میں آصف علی زرداری نے نئے سال کی آمد پر قوم کو مبارکباد دیتے ہوئے کہا کہ نئے سال کے موقع پر دعاؤں میں سیلاب متاثرین کی بحالی اور مظلوم کشمیریوں کی آزادی کو یاد رکھا جائے، انتہائی تکلیف دہ ہے کہ خیبر پختونخوا اور بلوچستان میں ایک بار پھر دہشت گرد حملے کر رہے ہیں۔
سابق صدر نے مزید کہا کہ ہمارا وعدہ ہے دہشت گردوں کا صفایا کر کے دھرتی کو امن کا گہوارہ بنائیں گے، دنیا بلاول بھٹو زرداری کی بات سن رہی ہے اور ان کے موقف کی تائید بھی کر رہی ہے۔

انتخابات کے خوف سے بلاول سمیت پوری پارٹی ذہنی توازن کھو چکی، علی زیدی

کراچی: (ویب ڈیسک) پاکستان تحریک انصاف (پی ٹی آئی) سندھ کے صدر و سابق وفاقی وزیر علی زیدی نے کہا ہے کہ انتخابات کے خوف سے بلاول سمیت پوری پیپلز پارٹی ذہنی توازن کھو چکی ہے۔
بلاول زرداری کے بیان پر رد عمل دیتے ہوئے علی زیدی کا کہنا تھا کہ بلاول کی تقریر سے صاف ظاہر ہو رہا ہے کہ پیپلز پارٹی نے الیکشن میں اپنی شکست تسلیم کر لی ہے، بلاول اپنے والد کی طرح گیدڑ بھبکیاں دینے لگا ہے، سندھ کے عوام باشعور ہیں، وہ اب ان کی باتوں میں آنے والے نہیں۔
علی زیدی نے کہا کہ پیپلز پارٹی اور ایم کیو ایم کی بدمعاشیوں کے دن چلے گئے، بلاول کو ہر فورم پر ناکامی کا سامنا کرنا پڑ رہا ہے، بلدیاتی انتخابات میں بھی انہیں بدترین شکست کا سامنا کرنا پڑے گا، دہشت گردی کو پروان چڑھانے والے اب ملبہ ہماری حکومت پر ڈال رہے ہیں۔
سابق وفاقی وزیر کا کہنا تھا کہ عمران خان نے ملک کو دہشت گردی سے نجات دلائی تھی، انہوں نے سندھ کا جو حال کیا ہے دنیا نے دیکھا ہے، سندھ کو نوچ نوچ کر کھانے والوں کا اقتدار اب اختتام کے قریب پہنچ چکا ہے۔
انہوں نے کہا کہ عمران خان نے ملک کو ترقی کی راہ پر گامزن کیا ہوا تھا، بلاول کو پتہ ہے حکومت جانے کے بعد باپ بیٹے دونوں بیروزگار ہوجائیں گے، تحریک انصاف ہی واحد جماعت ہے جو ملک کو بحرانوں سے نکالے گی۔

کوئلے کی کان میں دھماکا، 2 کان کن جاں بحق

پشاور: (ویب ڈیسک) ہنگو، اورکزئی ضلع کے علاقے میں کول مائن میں گیس بھر جانے سے دھماکہ ہوا جس میں 2 کان کن جاں بحق ہو گئے ہیں۔
ریسکیو ذرائع کے مطابق حادثے میں 2 کان کن جاں بحق جبکہ ایک زخمی ہو گیا، حادثے کی اطلاع پر ریسکیو ٹیموں کی جانب سے آپریشن کر کے کان کنوں کی لاشوں کو نکالا گیا۔
ریسکیو ذرائع کا کہنا ہے کہ زخمی ہونے والے شخص کا نام سعید ولی ہے جس سے متعلق بتایا گیا ہے کہ وہ کان کا مالک ہے، سعید ولی کو زخمی حالت میں ہسپتال منتقل کر دیا گیا ہے۔
ریسکیو ذرائع کا مزید کہنا ہے کہ جاں بحق کان کنوں کا تعلق ضلع شانگلہ سے ہے جبکہ دھماکے کے بعد ریسکیو آپریشن مکمل کر لیا گیا ہے۔

سال 2022ء؛ قومی اسمبلی کی ریکارڈ قانون سازی، 62 بلز منظور

اسلام آباد: (ویب ڈیسک) قومی اسمبلی سیکریٹریٹ نے ایوان کی سال 2022ء کی کارکردگی رپورٹ جاری کردی جس کے مطابق 2022 میں عوام کی فلاح و بہبود کے لیے قومی اسمبلی میں ریکارڈ قانون سازی کی گئی، اس سال قومی اسمبلی نے قانون سازی کے ساتھ ساتھ پارلیمانی سفارت کاری کے محاذ پر اہم سنگ میل عبور کیے۔
قومی اسمبلی سیکریٹریٹ کے مطابق قومی اسمبلی کے ایوان نے سال 2022 میں قانون سازی کے شعبے میں غیر معمولی کارکردگی کا مظاہرہ کیا،جنوری 2022 سے دسمبر 2022 تک قومی اسمبلی میں 47 سرکاری بلز اور 15 پرائیویٹ ممبر بلز منظور کیے گئے، ان میں 38 بلز ایکٹ آف پارلیمنٹ بن چکے ہیں۔
بتایا گیا ہے کہ قومی اسمبلی کی جانب سے جو نمایاں قانون سازی کی گئی ان میں الیکشن بل، رحمت العالمینﷺ اتھارٹی بل، نیشنل ہائی وے سیفٹی بل، پاکستان میڈیکل اینڈ ڈینٹل کونسل بل، کرمنل لاء بل، پاکستان ایکسپورٹ اینڈ امپورٹ بل، قومی احتساب بل، پاکستان ٹوبیکو بل، اینٹی ڈمپنگ ڈیوٹیز بل، کیپٹل ڈویلپمنٹ اتھارٹی بل، پٹرولیم بل، غیر ملکی سرمایہ کاری اور اسلام آباد میں بلدیاتی انتخابات بل شامل ہیں۔
رپورٹ کے مطابق سال 2022 میں مختلف امور پر ایوان میں 25 قراردادیں منظور کی گئیں، قومی اسمبلی سیکریٹریٹ کو اراکین کی جانب سے 3751 سوالات موصول ہوئے ان میں سے 1004 جوابات دیے گئے، کل 183 توجہ دلاؤ نوٹس موصول ہوئے ان میں سے 71 ایوان میں پیش کیے گئے اور 43 پر بحث ہوئی۔
قومی اسمبلی سیکریٹریٹ کے مطابق سال 2022ء میں مجموعی طور پر 82 استحقاق کی تحریکیں موصول ہوئیں ان میں سے 45 متعلقہ کمیٹی کو بھیج دی گئیں، قومی اسمبلی قواعد و ضوابط کے طریق کار 2007ء کے قاعدہ 259 کے تحت 124 تحاریک موصول ہوئیں جن میں سے 32 ایوان میں پیش کی گئیں۔
پارلیمنٹ کی تاریخ میں پہلی بار معاشرے کے پس ماندہ طبقات سے تعلق رکھنے والوں کو ایوان میں بلایا گیا۔ خواتین بچوں، اقلیتی برادری اور خواجہ سراؤں کے لیے قومی اسمبلی کے دروازے تین دن کے لیے کھولے گئے، اسپیکر قومی اسمبلی راجہ پرویز اشرف کی ہدایت پر ایوان کی ڈائمنڈ جوبلی منائی گی خصوصی تقریبات کا انعقاد کیا گیا جس میں معاشرے کی تمام طبقات نے شرکت کی۔
قومی اسمبلی سیکریٹریٹ اسپیکر قومی اسمبلی کی خصوصی توجہ کے باعث بچوں کے حقوق کے تحفظ کے لیے پہلا پارلیمانی کاکس تشکیل دیا گیا، موسمیاتی تبدیلیوں کے چیلنجز کو اجاگر کرنے میں پارلیمانی سفارت کاری نے اہم کردار ادا کیا اور اس معاملے پر ایشیاء پیسیفک ریجن کے ممبر ممالک پر مشتمل آئی پی یو سیمینار منعقد کرایا گیا، آئی پی یو کی جنرل اسمبلی میں موسمیاتی تبدیلیوں کی وجہ متاثر ہونے والے ترقی پذیر ممالک کے لیے ہنگامی فنڈ کے قیام کے لیے قرارداد پیش کی گئی۔
قومی اسمبلی سیکریٹریٹ نے بتایا کہ اس سال کاپ COP-27 کانفرنس میں لاس اینڈ ڈیمجز فنڈ کا قیام عمل میں لایا گیا جو قومی اسمبلی کی کامیاب پارلیمانی سفارت کاری کا عکاس ہے، 2022ء قانون سازی کے اعتبار سے ایک تاریخی اہمیت کا حامل سال رہا،
رپورٹ کے مطابق سال 2022 میں قومی اسمبلی کے سوشل میڈیا کو عوام اور ان کے نمائندوں کے درمیان خلا کو پر کرنے کے لیے فعال بنایا گیا، سال 2022ء پاکستان کی پارلیمانی تاریخ کا اس اعتبار سے بھی اہم سال رہا ہے کہ اس سال میں پارلیمان نے قانون سازی کے سوا کئی دیگر اہم سنگ میل عبور کیے جن میں ڈائمنڈ جوبلی کی تقریبات کے موقع پر پہلی بار پارلیمنٹ کے دروازے عوام کے لیے کھولے گئے ان میں خواتین، بچوں اور اقلیتوں، سابق اور موجودہ اراکین پارلیمنٹ نے شرکت کی۔
بتایا گیا ہے کہ ڈائمنڈ جوبلی کی تقریبات میں سماج کے انتہائی پس ماندہ طبقات کو ارکان پارلیمنٹ کے لیے مخصوص نشستوں پر بٹھایا گیا، ان ڈائمنڈ جوبلی تقریبات کو عوام میں بھرپور پذیرائی حاصل ہوئی، پارلیمنٹ میں کی گئی ایک بچے کی تقریر کو ٹوئٹر پر 60 لاکھ افراد نے دیکھا جو کہ پہلی بار پارلیمنٹ کا ٹوئٹر اکاؤنٹ ٹاپ ٹرینڈ رہا۔
رپورٹ کے مطابق آئی پی یو کے ایشیا پیسفک ریجن کے ایس ڈی جیز کے رکن ممالک کا دو روزہ سیمینار منعقد ہوا، سیمینار 13 اور 14 ستمبر 2022ء کو قومی اسمبلی کی میزبانی میں پارلیمنٹ ہاؤس اسلام آباد میں منعقد ہوئے، سیمینار میں رکن ممالک کے مندوبین کو پاکستان میں سیلاب کی بدترین تباہی کاریوں سے آگاہ کیا گیا، آئی پی یو ایشیا پیسیفک خطے کے ممالک سے روانڈا میں آئی پی یو جنرل اسمبلی میں ہنگامی قرارداد پیش کرنے کو کہا گیا۔

پشاور میں سی این جی سٹیشنز کل سے ایک ماہ کیلئے بند

پشاور: (ویب ڈیسک) دفعہ 144 کے تحت صوبائی دارالحکومت پشاور میں ایک ماہ کے لئے سی این جی سٹیشنز بند کرنے کا نوٹیفکیشن جاری کر دیا گیا۔
نوٹیفکیشن کے مطابق یکم جنوری سے 31 جنوری 2023ء تک پشاور میں تمام سی این جی سٹیشنز بند رہیں گے، سی این جی سٹیشنز بندش کا فیصلہ گھریلو صارفین کو گیس کی فراہمی کے لئے کیا گیا ہے۔
مزید برآں سی این جی سٹیشنز بندش کی پابندی کی خلاف ورزی کرنے والے پمپس مالکان کے خلاف کارروائیوں کی ہدایت بھی کی گئی ہے

منحرف ایم پی اے کی رکنیت منسوخی کیلئے ریفرنس بھیج دیا، مسرت چیمہ

لاہور: (ویب ڈیسک) ترجمان وزیر اعلیٰ و حکومت پنجاب مسرت جشمید نے چیمہ نے کہا ہے کہ اسپیکر پنجاب اسمبلی نے پی ٹی آئی کے منحرف ممبر صوبائی اسمبلی چودھری مسعود احمد کے خلاف الیکشن کمیشن کو ریفرنس بھیج دیا ہے۔
اپنے ایک بیان میں ترجمان پنجاب حکومت مسرت جمشید چیمہ نے کہا استدعا ہے کہ الیکشن کمیشن پی ٹی آئی کی دائر درخواستوں پر درگزر کرنے کی بجائے ایکشن لے، لوٹا بننے والے اراکین کا مستقبل نااہلی ہے، پارٹی سے غداری کرنے والوں کا آئندہ الیکشن میں عوام کڑا احتساب کریں گے۔
انہوں نے کہا کہ اراکین اسمبلی کو خریدنے والے سوائے چند ٹکوں کے کچھ نہیں پاسکیں گے، چیئرمین پاکستان تحریک انصاف کی قیادت میں زر بابا اور چالیس چوروں کے خلاف متحد ہیں، ضمیر کا سودا کرنے والے کسی صورت پارٹی میں واپس نہیں لیے جائیں گے۔

2022 میرے لیے بہت زبردست گزرا: قومی ویمن کرکٹر ندا ڈار

لاہور: (ویب ڈیسک) پاکستان ویمن ٹیم کی پلیئر ندا ڈار نے جیو نیوز سے گفتگو میں کہا ہے کہ 2022 میرے لیے بہت زبردست گزرا، پی سی بی کوچنگ اسٹاف اور ساتھی کرکٹرز نے بہت سپورٹ کی۔
ندا ڈار نے کہا کہ میری کارکردگی میں بسمہ معروف کا بھی اہم کردار ہے، بسمہ کے ساتھ کافی پارٹنرشپس لگیں، عالیہ کے ساتھ بھی شراکت رہی، بہت اچھا سال رہا، دوسری لڑکیوں کو بھی میری کارکردگی سے حوصلہ ملا۔
ندا ڈار نے کہا کہ ہمیشہ بطور آل راؤنڈر پاکستان کیلئے بہترین پرفارمنس دینے کی کوشش رہی، 2019 میں کم بیک کے بعد سے بہت اچھا سفر جا رہا ہے، ایوارڈز اور اس کیلئے نامزدگی سے ہمیشہ مزید بہتر کرنے کا حوصلہ ملتا ہے، کوشش ہے کہ آئندہ آنے والے برسوں میں بھی ایسی کارکردگی دکھاؤں۔
انہوں نے کہا کہ بہترین پلیئر کیلئے نامزد ہونا بھی بڑی بات ہے، اللہ نے چاہا تو ایوارڈ بھی ملے گا، 2022 میں ایشیا کپ میں انڈیا اور کامن ویلتھ گیمز میں بارباڈوس کیخلاف پرفارمنس یادگار ہیں، کوشش ہوگی کہ ورلڈ کپ میں پاکستان کی بہترین آل راؤنڈر بنوں۔
ندا ڈار نے مزید کہا کہ عالمی آل راؤنڈر رینکنگ میں ساتواں نمبر ہے، ٹاپ ٹو میں آنا چاہتی ہوں، خواہش ہے کہ مزید دو سال پاکستان کیلئے کھیلوں، ورلڈ کپ سے قبل آسٹریلیا سے سیریز تیاریوں میں مددگار ثابت ہوگی، اچھی ٹیم کیخلاف کھیل کر ہمیں اعتماد بھی ملے گا اور کھیل بہتر ہوگا۔

کیتھولک عیسائیوں کے سابق پوپ بینی ڈکٹ انتقال کرگئے

سینٹ پیٹرز: (ویب ڈیسک) کیتھولک عیسائیوں کے سابق پوپ بینی ڈکٹ 95 سال کی عمر میں ویٹی کن میں انتقال کرگئے۔
کیتھولک چرچ کے سابق سربراہ 95 سالہ بینی ڈکٹ گذشتہ چند دنوں سے شدید علیل تھے، چند روز قبل پوپ فرانسس نے بینی ڈکٹ کی صحت یابی کے لیے دعا کی درخواست کی تھی۔
بینی ڈکٹ نے 2005 سے لےکر 2013 تک کیتھولک چرچ کی سربراہی کی جس کے بعد وہ خرابی صحت کی وجہ سے اس عہدے سے دستبردار ہوگئے تھے، وہ 600 سال میں مستعفی ہونے والے پہلے پوپ تھے۔
ویٹی کن نے ایک بیان میں کہا ہےکہ سابق پوپ کی میت کو 2 جنوری سے سینٹ پیٹرز بیسیلیکا گرجا گھر میں رکھا جائےگا جہاں لوگ ان کا دیدار کر سکیں گے اور 5 جنوری کو سینٹ پیٹرز اسکوائر میں ان کی آخری رسومات پوپ فرانسس ادا کروائیں گے۔

حج وعمرہ زائرین کے سوا دیگر مسافروں کے آب زم زم لے جانے پر پابندی عائد

جدہ: (ویب ڈیسک) سعدی وزارت حج وعمرہ نے حج اور عمرے پر کے زائرین کے سوا دیگر تمام افراد پر آب زم زم لےجانے پر پابندی عائد کردی گئی۔
غیر ملکی خبر رساں اداے کے مطابق سعودی وزارت حج و عمرہ نے سعودی عرب کے لیے آپریٹ کرنے والی تمام ائرلائنز کو مراسلہ ارسال کردیا۔
وزارت کے فیصلے کے مطابق صرف حج اور عمرے پر آنے والے مسافر ہی آب زم زم اپنے ہمراہ لاسکتے ہیں۔
مراسلے میں کہا گیا ہے کہ وزٹ ویزا، بزنس ویزا اور نوکری پیشہ افراد اپنے ہمراہ آب زم زم ساتھ نہیں لا سکتے، حج اور عمرے کے مسافرں کے لیے بھی کنگ عبداللہ بن عبدالعزیز زم زم واٹر کی پانچ لیٹر کی صرف ایک بوتل ہی جہاز پر لوڈ کی جا سکتی ہے۔

ساحل پر کوئی پابندی نہیں، نئے سال پر شہری ‘سی ویو’ آ سکتے ہیں، انتظامیہ

کراچی: (ویب ڈیسک) انتظامیہ نے شہریوں کو ‘سی ویو’ پر آنے کی اجازت دیتے ہوئے کہا ہے کہ نئے سال کے موقع پر شہری ‘سی ویو’ پر سیر و تفریح کیلئے آ سکتے ہیں، ساحل پر کوئی پابندی نہیں۔
ایس ایس پی ساؤتھ کا کہنا تھا کہ عوام کی حفاظت کیلئے پولیس سی ویو پر موجود ہے، پولیس ریسٹورنٹس اور دکانوں کو 8 بجے بند کرنے کا حکم دے چکی ہے۔
دوسری جانب حیدرآباد کے شہریوں کی بڑی تعداد جامشورو کے مقام المنظر پر جمع ہوئی، شہریوں نے دریائے سندھ میں پھول ڈال کر سال 2022 کے آخری سورج کو الوداع کیا، شہریوں نے آخری سورج کے ساتھ تصاویر بھی۔
حیدر آباد کے شہریوں سمیت ادیب و دانشوروں نے بھی آخری سورج کو الوداع کیا، شہریوں کی جانب سے نئے سال میں ملک پاکستان اور سندھ کی خوشحالی کے لیے دعا بھی کی گئی۔

قیمتوں میں مسلسل اضافے کے بعد سونا سستا ہوگیا

کراچی: (ویب ڈیسک) ملک میں سونے کی فی تولہ قیمت میں کمی ہوگئی۔
آل پاکستان جیمز اینڈ جیولرز ایسوسی ایشن کے مطابق سونے کی فی تولہ قیمت 200 روپے کمی کے بعد ایک لاکھ 83 ہزار 900 روپے ہوگئی۔
10 گرام سونے کا بھاؤ 171 روپے کمی کے بعد ایک لاکھ 57 ہزار 665 روپے ہے۔ ایسوسی ایشن کے مطابق عالمی صرافہ بازار میں سونے کا بھاؤ 6 ڈالرز اضافے سے 1824 ڈالرز فی اونس ہے۔

عمران خان نے نفرت کی سیاست سے جمہوریت کو نقصان پہنچایا، بلاول بھٹو

کراچی: (ویب ڈیسک) پاکستان پیپلز پارٹی کے چیئرمین اور وزیر خارجہ بلاول بھٹو نے کہا ہے کہ عمران خان نے نفرت کی سیاست سے جمہوریت کو نقصان پہنچایا، ناکام وزیر اعظم کو جمہوری طریقہ سے گھر بھجوایا گیا، آج بنی گالہ سے چیخیں نکل رہی ہیں، پیپلز پارٹی ہی ملک کو مسائل سے نکال سکتی ہے۔
تقریب سےخطاب کرتے ہوئے بلاول بھٹو نے کہا کہ پیپلز پارٹی نےماضی میں بھی مشکلات کا سامنا کر کے ملک کو بچایا تھا، مستقبل میں بھی پیپلز پارٹی ملک کو بچائے گی، پیپلز پارٹی کی سب سے بڑی طاقت یکجہتی کی سیاست ہے، ہم نےاسی یکجہتی کے ساتھ پورے ملک کو چلانا ہے۔
وزیر خارجہ نے کہا کہ پیپلز پارٹی تقسیم، نفرت کی سیاست پر یقین نہیں رکھتی، نفرت کی سیاست پر یقین رکھنے والے کہتے ہیں یہ شہرایک سوچ رکھنے والوں کا ہے، پیپلز پارٹی کہتی ہے یہ شہر سب کا ہے، پیپلز پارٹی سب طبقوں کی نمائندگی کرتی ہے۔
بلاول بھٹو نے کہا کہ ایک طرف خان کہہ رہا ہے استعفے منظور کریں، جب نمائندے سپیکر کے پاس جاتے ہیں تو کہتے ہیں استعفے منظور نہ کرو، یہ جھوٹ کی سیاست کر رہے ہیں، اصل میں الیکشن سے وہ بھاگ رہے ہیں، جہاں جیالا کھڑا ہو گا وہ الیکشن ہاریں گے۔
چیئرمین پیپلزپارٹی کا کہنا تھا کہ کارکن لانگ مارچ کے ذریعے اسلام آباد پہنچے، اسلام آباد پہنچ کر ناکام وزیراعظم کو جمہوری طریقے سے گھر بھیجا، ہم سلیکٹڈ راج کے خلاف نکلےتھے، سلیکٹڈ کو گھر بھیجنا کارکنوں کی جیت ہے، پہلے آمریحییٰ خان کا مقابلہ کیا، مشرف کو بھگایا اور پھر کٹھ پتلی کو نکالا۔
انہوں نے کہا کہ جب بھی مقابلہ ہو گا جیت سچ کی ہو گی، جب بھی مقابلہ ہو گا تو کٹھ پتلیوں، سلیکٹڈ کو شکست اور جمہوری قوتوں کی فتح ہو گی، اس وقت ملک مشکل میں ہے، عمران کی نفرت کی سیاست نے جمہوریت، معاشرے، معیشت کو نقصان پہنچایا، اگر ہم نے مشکل سے نکلنا ہے تو شہید بھٹو کا منشور سامنے ہے۔
وزیر خارجہ نے کہا کہ مراد علی شاہ اور ان کی ٹیم کی محنت کو سراہتا ہوں، مجھے اکثر کہا جاتا ہے مراد علی شاہ صرف کراچی کے وزیر اعلیٰ ہیں، جتنے کام مراد علی شاہ نے کراچی میں کیے تاریخ میں کسی وزیراعلیٰ نے نہیں کیے، ہمارا وزیراعلیٰ پورا سندھ اور کراچی کا بھی ہے، ماضی میں بندوق، دہشت کے خوف سے پیپلز پارٹی کے ووٹرز کو دبا کر مصنوعی مینڈیٹ لایا جاتا تھا، کراچی کے جیالے عوام کی خدمت میں مصروف ہیں۔
بلاول بھٹو کا کہنا تھا کہ مندو خیل کی سیٹ پر 2018 میں کسی اور کو مسلط کیا گیا، لیاری کے مینڈیٹ پر بھی ڈاکہ مارا گیا، بلدیاتی الیکشن میں تاخیر سے نمائندے تنگ ہو رہے ہیں، پہلے ہم شکایات کرتے تھے ہم سے الیکشن کا موقع چھینا جا رہا ہے، ہم امید کرتے ہیں 15 جنوری کو شہر کراچی میں بلدیاتی الیکشن ہو گا۔
چیئرمین پیپلز پارٹی نے کہا کہ پورا کراچی الیکشن کے لیے تیار ہے، بلدیاتی نمائندے عوام کی خدمت کرنا چاہتے ہیں، اب سیلاب تو چلا گیا، کراچی، حیدر آباد کو نمائندے ملنے چاہئیں، ہمیں اس بات کا کوئی خوف نہیں کون جیتے یا ہارے، صاف اور شفاف الیکشن ہونا چاہیے، جیتنے والوں کو قبول کریں گے، کارکنوں کا جذبہ دیکھ کر صاف نظر آ رہا ہے اگلا میئر اسی میدان میں بیٹھا ہے۔
بلاول بھٹو نے کہا کہ ہرڈسٹرکٹ میں مفت علاج کی سہولت پہنچائیں گے، ہمیں مہنگائی، بے روزگاری کا احساس ہے، عمران کےمہنگائی کےاثرات ہم سب بھگت رہےہیں۔
آج نئے سال کا جشن کراچی والوں کیساتھ منانا ہے، پورا شہر آج رات 12 بجے باہر نکلے گا، کراچی کی ہر گلی، یونین کونسل میں لوگ نئے سال کا جشن منائیں گے، ایک سال میں کارکنوں نے وہ کام کر کے دکھایا جس کا وعدہ کیا تھا۔
انہوں نے کہا کہ ہم جانتے ہیں بہت سارے مسائل ہیں، دہشت گردی کا مقابلہ پیپلز پارٹی اور جیالوں نے کیا، شہرمیں پبلک ٹرانسپورٹ بھی بڑا مسئلہ ہے، ہم چاہتے ہیں ایسی پبلک ٹرانسپورٹ ہو جس سےعام آدمی کو سہولت ہو، عوامی بس منصوبے پر ڈسٹرکٹ میں کام شروع ہو گیا ہے، ہرڈسٹرکٹ میں پیپلز بس سروس کو پہنچائیں گے، مہنگائی کے دور میں عام آدمی مشکل میں ہے، کم وسائل کے باوجود کام کر کے دکھائیں گے۔
بلاول بھٹو نے کہا کہ ہم نے ہر قسم کی دہشت گردی کا مقابلہ کیا، ہم نے انتہا پسندی، مذہبی، لسانیت کی دہشت گردی کا مقابلہ کیا، جیالوں کی شہادتوں کی وجہ سے ہم نے ان کو شکست دلوائی، محترمہ بینظیر بھٹو شہید انہی انتہا پسند، دہشت گردوں کا مقابلہ کرنے آئی تھیں، محترمہ بندوق کی سیاست پر یقین کرنے والوں کا مقابلہ کرنے آئی تھیں، محترمہ پیچھے نہیں ہٹی اورشہادت قبول کی۔
چیئرمین پاکستان پیپلز پارٹی نے کہا کہ دہشت گردی کے خلاف جنگ میں فوج، پولیس، بچوں نے بھی قربانیاں دیں، جو کام نیٹو نہیں کر سکی ہم نے وہ کام پاکستان میں کر دکھایا، ہم نےدہشت گردوں کو شکست دی، عمران خان نے معاشرے، جمہوریت کو نقصان پہنچایا، معاشی بحران پیدا کیا، جس کا بوجھ عام آدمی اٹھا رہا ہے، جو دہشت گرد شکست کھا چکے تھے جن کو چاروں کونوں سےنکالا عمران نے ان کو دوبارہ کھڑا کر دیا، عمران نےشہدا کے لہو کا سودا کیا۔
بلاول بھٹو کا کہنا تھا کہ سانحہ اے پی ایس میں جو دہشت گرد پکڑے گئے ان کو بھی چھڑا دیا گیا، جو افغان حکومت کے قیدی تھے، ان کو بھی چھوڑ دیا گیا، دہشت گردوں کو رہا کرا کر قبائلی علاقوں میں بٹھا دیا گیا، ہمیں امپورٹڈ کہتا ہے اس نے تو دہشت گردی کو امپورٹ کر دیا، دہشت گردوں کو واپس بلا کر ان کی مہمان نوازی کی گئی، وہ لوگ ہتھیارسمیت واپس آئے۔
وزیر خارجہ نے عمران خان پر الزام لگاتے ہوئے کہا کہ تین دن پہلے ٹی وی میں کہتا ہے اس قسم کے 50 ہزارلوگوں کو آباد کراؤں گا، پاکستان کی پارلیمنٹ، شہدا کے لواحقین سے پوچھے بغیر دہشت گردوں کو واپس لایا گیا، دہشت گردی اس لیے ہو رہی ہے کیونکہ عمران ان کو واپس لایا، یہی وجہ ہے دہشت گردی اور کرائم میں اضافہ ہوا ہے، یہ عمران خان کا سب سے بڑا گناہ ہے، نیشنل سکیورٹی پر کمپرؤمائز کیا گیا، ملک میں بڑی مشکل سے امن قائم کیا گیا تھا،حساب چاہئے۔
انہوں نے کہا کہ عمران خان کی دہشت گردی کی پالیسی کو ری ویو کرنا پڑے گا، ہمیں پاکستان کے مفاد کے مطابق پالیسی کو بنانا پڑے گا، ریاستی رٹ پر کوئی کمپرو مائز نہیں کرینگے، دہشت گردوں کو شکست دے کر امن قائم کریں گے۔
بلاول بھٹو نے کارکنوں کو ہدایت کرتے ہوئے کہا کہ بلدیاتی الیکشن میں 15 دن رہ گئے، الیکشن کمیشن کی ہدایت کے مطابق میں کمپین نہیں کر سکتا، جیالے زیادہ محنت کریں۔