وزیر اعظم عمران خان نے اپنے بھارتی ہم منصب نریندر مودی کو یوم پاکستان کی مبارکباد دینے پر شکریے کا جوابی خط لکھا ہے۔

وزیراعظم نے یوم پاکستان کی مبارک باد دینے پر مودی کا شکریہ ادا کیا اور کہا ہے کہ پاکستانی حکومت اور عوام بھارت سمیت تمام ہمسایہ ممالک سے پرامن، تعاون پر مبنی تعلقات چاہتے ہیں۔

خط میں کہا گیا ہے کہ جنوبی ایشیا میں دیرپا امن واستحکام کیلئے کشمیر سمیت تمام تصفیہ طلب تنازعات کا حل ہونا ضروری ہے، جبکہ تعمیری اور نتیجہ خیزمذاکرات کیلئے سازگارماحول پیداکرنا ضروری ہے۔

وزیراعظم کا کہنا تھاکہ کورونا کے خلاف بھارت کے عوام کیلئے نیک خواہشات کا اظہار کرتا ہوں۔

خیال رہے کہ گزشتہ دنوں یوم پاکستان پر مبارکباد کا خط لکھا تھا اور کہا تھا کہ پاکستان کے ساتھ خوشگوار تعلقات چاہتے ہيں۔

وزیراعلیٰ عثمان بزدار نے چنیوٹ میں اربوں روپے کے منصوبوں کا افتتاح اور سنگ بنیاد رکھ دیا۔ انہوں نے کہا کہ ہر ضلع کے لئے ڈویلپمنٹ پیکج لا رہے ہیں، عوامی مسائل جلد از جلد حل کریں گے۔

وزیراعلیٰ پنجاب عثمان بزدار نے میڈیا سے گفتگو کرتے ہوئے کہا کہ چنیوٹ میں 250 بستروں پر مشتمل ہسپتال بنایا جائے گا، سڑکوں کی تعمیر سے متعلق 4 منصوبے بھی شامل ہیں، چاہتے ہیں پورے پنجاب کی یکساں ترقی ہو، پنجاب کے تمام اضلاع کو ترقیاتی پیکج دے رہے ہیں، چنیوٹ اور فیصل آباد کیلئے 10 ارب کا پیکج دیا۔ ان کا کہنا تھا رمضان بازار میں 2018 کے نرخوں پر اشیا ملیں گی۔

اسلام آباد: سابق وزیر خزانہ حفیظ شیخ بھی کورونا وائرس میں مبتلا ہوگئے۔

وفاقی وزیر خزانہ کا قلمدان سنبھالنے والے حماد اظہر نے سابق وزیر خزانہ حفیظ شیخ کے کورونا میں مبتلا ہونے کی تصدیق کی ہے۔

حماد اظہر نے اپنی ٹوئٹ کے ذریعے حفیظ شیخ کا کورونا ٹیسٹ مثبت آنے کی اطلاع دی۔

وفاقی وزیر خزانہ نے حفیظ شیخ کی جلد صحتیابی کے لیے دعاؤں کی بھی اپیل کی۔

واضح رہےکہ وفاقی حکومت نے گزشتہ روز ہی حفیظ شیخ کو وزارت خزانہ کی ذمہ داریوں سے ہٹایا ہے اور ان کی جگہ حماد اظہر کو وزارت خزانہ کا اضافی چارج دیا گیا ہے۔

سابق وزیراعظم شاہد خاقان عباسی نے کہا ہے کہ نیب کا ادارہ اپوزیشن پر دبائو ڈالنے کیلئے ہی بنا۔منگل کو اسلام آبادمیں احتساب عدالت کے باہر میڈیا سے گفتگو کرتے ہوئے انہوں نے کہاکہ آمر کی پیداوار نیب اور ملک ایک ساتھ نہیں چل سکتے، نیب کے اقدامات ملکی مفاد میں نہیں، نیب کا ادارہ اپوزیشن پر دبائو ڈالنے کیلئے ہی بنا ،تین سال سے کیس زیر سماعت ہے۔ جو ہم پہلے دن سے جانتے تھے آج پورا ملک جانتا ہے۔انہوں نے کہا کہ سیاسی نظام کو دبائو میں لایا جارہاہے، تین وزرائے اعظم کے خلاف کیسز کئی سال سے چل رہے ہیں ، براڈ شیٹ اسکینڈل کی فائلیں غائب ہورہی ہیں۔ اپنے خلاف کوئی کیس آتا ہے تو اس کیس کی فائلیں ہی غائب ہوجاتی ہیں، کیمرے لگا کر عدالتی کارروائی عوام کو کیوں نہیں دکھاتے۔ا نہوں نے کہا کہ خیرات لیکر کورونا سے نمٹا جارہا ہے، کسی بھی ملک میں کورونا ویکسین بیچنے کی اجازت نہیں، پاکستان واحد ملک ہے جس نے پولیوکا ایک ٹیکہ نہیں خریدا،پاکستان واحد ملک ہے جس نے پرائیویٹ سیکٹر کوویکسین خریدکربیچنے کی اجازت دی۔ انہوں نے کہا کورونا کے پھیلائو کی شرح گذشتہ ایک سال سے زیادہ ہے، این سی او سی ناکام ہوچکا انہیں پتہ نہیں چلا کہ کورونا کا پھیلائو کیسے روکا جائے۔انہوں نے بتایا کہ این سی او سی کے ایجنڈے میں کوروناویکسین کا ذکر نہیں، ماسک نہ پہننے پر حکومت ہمیں گرفتار کرلے۔ انہوں نے کہا کہ پاکستان ڈیمو کریٹک موومنٹ کی فکر نہ کریں، فکر حکومت کی کریں، الحمداللہ پی ڈی ایم بالکل قائم دائم ہے۔انہوں نے کہا کہ مہنگائی روزبروز بڑھ رہی ہے ،بیروزگار ی میں اضافہ ہوا ہے.

صوبائی حکومت میں تبدیلی لانے کے لیے پنجاب اسمبلی میں اپوزیشن لیڈر سے رجوع کرنے کا فیصلہ کرتے ہوئے پاکستان پیپلز پارٹی (پی پی پی) کا کہنا ہے کہ انہوں نے اس سلسلے میں اپنی سرگرمیاں شروع کردی ہیں۔

 پیپلز پارٹی کے پارلیمانی رہنما سید حسن مرتضیٰ نے صحافیوں کو بتایا کہ ‘ہم نے پنجاب [اسمبلی] میں تبدیلی کے لیے باضابطہ طور پر اپنی کوششیں شروع کر دی ہیں اور آنے والے دنوں میں بھی اس میں شدت پیدا ہوگی۔

انہوں نے کہا کہ عوام عیدالفطر کے بعد خوشخبری سنیں گے کیونکہ حکمران پاکستان تحریک انصاف کے دو درجن سے زیادہ قانون ساز ہمارے ساتھ رابطے میں ہیں۔

سید حسن مرتضیٰ نے کہا کہ پارٹی نے وزیر اعلی کے عہدے کے لیے اپنے امیدوار کو آگے لانے سے پہلے ہی پاکستان مسلم لیگ (ن) کو ایوان کی دوسری بڑی جماعت ہونے کی پیش کش کی تھی۔

انہوں نے کہا کہ ان کی پارٹی نے اپوزیشن لیڈر حمزہ شہباز سے رجوع کرنے کا فیصلہ کیا ہے۔

سید حسن مرتضیٰ نے کہا کہ ان کی پارٹی (مسلم لیگ ن) کو پنجاب اسمبلی میں اپنی عددی طاقت کو مدنظر رکھتے ہوئے صوبائی چیف ایگزیکٹو کے دفتر کے لیے نامزد امیدوار کا اعلان کرنا چاہیے اور پیپلز پارٹی اس کی حمایت کرے گی۔