کراچی(آئی این پی)قومی کرکٹ ٹیم کے کپتان سرفرازاحمد کانٹی کرکٹ کھیلنے انگلینڈ روانہ ہوگئے۔آئی سی سی چیمپئینزٹرافی کی فاتح قومی کرکٹ ٹیم کے کپتان سرفرازاحمد آئندہ ماہ انگلینڈ میں یارک شائرکانٹی کی جانب سے ایکشن میں نظرآئیں گے، سرفرازاہل خانہ کے ہمراہ کراچی سے لندن روانہ ہوگئے۔یارک شائرنے5میچزکیلئے سرفرازاحمد کی خدمات حاصل کی ہیں، سرفرازاحمد کانٹی کرکٹ کھیلنے والے پہلے پاکستانی وکٹ کی پرہوں گے جبکہ یارک شائرکی نمائندگی کرنےوالے تیسرے پاکستانی کھلاڑی ہیں۔ان سے قبل انضمام الحق اوریونس خان یارکشائرکی جانب سے کھیل چکے ہیں، قومی کپتان کانٹی کے بعد کیریبین پریمئیرلیگ میں شرکت کیلئے ویسٹ انڈیزروانہ ہوجائیں گے۔

ممبئی(بی این پی ) ہندستان کرکٹ بورڈ نے قومی ٹیم کے کپتان ویرات کوہلی کو پبلک سیکٹر میں ملازمت چھوڑنے کی ہدایت کردی۔بھارتی کرکٹ ٹیم کے کپتان آئل اینڈ نیچرل گیس کارپوریشن لمیٹڈ میں منیجر کا عہدہ سنبھالے ہوئے ہیں۔واضح رہے کہ نجی کمپنی سے وہ بھاری تنخواہ لیتے ہیں جوکہ بھارتی کرکٹ بورڈ کے آئین سے متصادم ہے۔

لاہور(آئی این پی) چیمپئنز ٹرافی جیتنے پر پی سی بی ملازمین کو ملنے والا بونس گورننگ بورڈ کو بھی کھٹکنے لگا۔جمعے کے روز لاہور میں منعقدہ پی سی بی گورننگ بورڈ میٹنگ کی اندرونی کہانیاں سامنے آ گئی ہیں، ذرائع نے بتایا کہ چیمپئنز ٹرافی جیتنے پر بورڈ ملازمین کیلیے بونس پر ایک رکن نے اعتراض کیا، ان کا کہنا تھا کہ یہ لوگ کون سا میدان بھی اترے تھے کہ بونس دیا جائے، اس پر انھیں جواب دیا گیا کہ ملکی تاریخ میں تیسری بار قومی ٹیم نے کوئی آئی سی سی ٹائٹل جیتا لہذا انعام تو بنتا ہی ہے، ڈومیسٹک کرکٹ میں ڈرافٹ سسٹم لانے کی تجویزپر شکیل شیخ کی اعجاز فاروقی سے خاصی گرما گرمی ہوئی۔اعلی حکام کی آنکھ کا تارا بنے ہوئے اسلام آباد کے آفیشل کا یہ آخری گورننگ بورڈ اجلاس تھا، ڈومیسٹک کرکٹ میں حالیہ تبدیلیاں بھی انھوں نے ہی کی ہیں، اس موقع پر ایک رکن نے تجویز پیش کی کہ کرکٹ کیلئے خدمات پر شکیل شیخ کو کوئی ذمہ داری سونپی جائے، مگر نجم سیٹھی نے واضح جواب دینے سے گریز کیا۔ایجنڈے میں امپائر اکرم رضا کی پابندی ختم کرنے کا معاملہ رکھنے پر بعض ارکان نے سخت احتجاج کیا۔

کولمبو(آئی این پی)سری لنکا نے بھارتی ایما پر آزادی کپ سے گرین شرٹس کا پتا صاف کردیا۔سری لنکا نے رواں برس کے آغاز میں اعلان کیا تھا کہ آئندہ برس مارچ میں اپنے70ویں یوم آزادی پر وہ ایک 4ملکی ون ڈے ٹورنامنٹ منعقد کرے گا جس میں بھارت اور جنوبی افریقہ کے ساتھ پاکستان کا نام بھی لیا گیا تھا، مگر اب اس ٹورنامنٹ کو ٹرائنگولر سیریز تک محدود کرنے کا فیصلہ کرلیا گیا اور ذرائع کا کہنا ہے کہ بھارتی ایما پر نہ صرف پاکستان کو اس ایونٹ سے نکال دیا گیا بلکہ جنوبی افریقہ کو بھی اب شامل نہیں کیا جا رہا، اس کی جگہ بنگلہ دیش کو دی جائے گی۔ اس وقت بھارتی ٹیم سری لنکا کے ٹور پر ہے اور ٹیسٹ سیریز کے بعد 5 ون ڈے اور ایک ٹوئنٹی 20 میچ کھیلے گی۔واضح رہے کہ فیوچر ٹور پروگرام کے تحت سری لنکا کو بھارت کا جوابی مکمل ٹور آئندہ برس فروری مارچ میں کرنا تھا تاہم اس نے بھارت کو راضی کیاکہ وہ رواں برس کے آخر میں ہی اس کی فل سیریز کیلیے میزبانی کرے۔دلچسپ بات یہ ہے کہ بھارتی ٹیم کو اسی عرصے میں جنوبی افریقہ کا بھی ٹور کرنا ہے، پروٹیز بورڈ کی یہ خواہش ہے کہ بھارتی ٹیم کے ساتھ وہ26 دسمبر کو باکسنگ ڈے ٹیسٹ کھیلے مگر بی سی سی آئی اسے بھی انتظار کی سولی پر لٹکائے ہوئے ہے۔ذرائع کا کہنا ہے کہ بھارت نومبر، دسمبر میں سری لنکا کی میزبانی کرے گا اور اس کے بعد ہی ٹیم جنوبی افریقہ جائے گی، ان دونوں سیریز کے پروگرام کا رواں ہفتے اعلان متوقع ہے۔ادھر سری لنکن ٹیم موجودہ سیریز کے بعد یو اے ای جائے گی جہاں پر پاکستان کے ساتھ ستمبر اکتوبر میں مکمل سیریز شیڈول ہے،اس کے بعد ٹیم کا بھارت جانے کا ارادہ ہے۔