کم ظرف بیٹوں کا ”ماں “ پر وحشیانہ تشدد

لاہور (کرائم رپورٹر)شفیق آباد کے علاقہ میں مبینہ طور پر 2بیٹوں نے پیسے مانگنے پر نہ دینے پر بھرے بازار میں ماں کے کپڑے پھاڑ دیے ،بیٹوں کے ہاتھوںسرِ بازار تذلیل کے بعد ماں کی پھندہ لیکر خودکشی کی کوشش ، بیٹی نے متعلقہ تھانے میں بھائیوں کے خلاف اندراج مقدمہ کیلئے درخواست دید ی ۔بتایا گیا ہے کہ شفیق آباد کے علاقہ گلی نمبر 3کچا راوی روڈ کی ممتاز بی بی نے گزشتہ روز پھندہ لیکر خودکشی کی کوشش کی جس پربیٹی شازیہ بی بی نے شور مچاتے ہوئے بچانے کی کوشش کی ۔ شور کی آواز سن کر اہل محلہ بھی اکھٹے ہوگئے جنہوں نے خاتون کو خودکشی سے روک لیا ۔ واقعے کے بعد بیٹی شازیہ بی بی نے تھانہ شفیق آباد تھانے میں اپنے بھائیوں کے خلاف اندراج مقدمہ کی درخواست دیتے ہوئے موقف اختیار کیا ہے کہ اس کے دونوں بھائی شادی شدہ ہیں اور الگ رہائش پزیر ہیں جن کی بیویاں ان کو میرے اور میری والدہ کے خلاف بہکاتی رہتی ہیں جبکہ میرے بھائی نشے کے بھی عادی ہیں ۔ وقوعے کے روز دونوں بھائیوں نے میری والدہ کو بازار میں روک کر پیسوں کا تقاضا کیا جس پر میری والدہ نے جب انکار کیا تو دونوں نے ان کو شدید تشدد کا نشانہ بناتے ہوئے بھرے بازار میں ان کے کپڑے پھاڑ دیے ۔ میری والدہ اپنے ہی بیٹوں کے ہاتھوں ہونے والی اس ذلالت کو برداشت نہ کرسکی جس پر انھوں نے گھر آکر پھندہ لیکرخودکی کی کوشش کی جسے میرے سمیت دیگر محلہ داروں نے بچا لیا ۔درخواست کے بعد پولیس نے واقعے کی تحقیقات شروع کر دی ہیں ۔