ٹرمپ سے متعلق روسی صدر کے حیران کن انکشافات

ماسکو(ویب ڈیسک)روسی صدر ولادیمیر پیوٹن نے کہا ہے کہ جب سے امریکی صدر ڈونالڈ ٹرمپ نے عہدہ سنبھالا ہے، روس کے امریکا کے ساتھ تعلقات خراب ہوئے ہیں۔ انھوں نے شام کے صدربشارالاسد کی حمایت کا اعادہ بھی کیا ہے۔روسی ٹی وی کوانٹرویو میں صدر پیوٹن نے کہا کہ اعتماد کے ساتھ کام کرنے اورفوجی سطح پرامریکا سے تعلقات بہتر نہیں ہوئے بلکہ بگڑے ہیں۔روسی صدر نے شام کے صدر بشار الاسد کی حمایت کا اعادہ کرتے ہوئے کہا کہ اس بات کا کیا ثبوت ہے کہ شامی فوج نے کیمیائی ہتھیار استعمال کیے؟ اس کا کوئی ثبوت نہیں لیکن اس سے بین الاقوامی قانون کی خلاف ورزی ضرور ہوئی ہے۔انھوں نے کہا کہ ہر کوئی جانتا ہے کہ روس نے شام کے کیمیائی ہتھیاروں کے بڑے ذخیرے کو ختم کرنے کا کام پوری ذمے داری سے ادا کیا ہے۔ اگرکسی کو کوئی شک ہے تو اقوام متحدہ کے ذریعے معائنہ کرایا جاسکتا ہے۔دوسری جانب روس نے شام کے مبینہ کیمیائی حملے سے متعلق اقوام متحدہ کی قرارداد ویٹو کردی ہے۔ قرارداد میں کیمیائی حملے کی تحقیقات سے متعلق شام سے مدد کا مطالبہ کیا گیا تھا۔قرارداد برطانیہ، فرانس اور امریکا کی جانب سے پیش کی گئی تھی،جس میں کہا گیاتھاکہ اقوام متحدہ کے انسپکٹرز شام میں کیمیائی ہتھیاروں سے متعلق تحقیقات کریں گے۔