امریکہ چرچ میں فائرنگ، 27 افراد ہلاک 30 زخمی

نیویارک (مانیٹرنگ ڈیسک) امریکی ریاست ٹیکساس کے ایک چرچ میں مسلح شخص کی جانب سے فائرنگ کی گئی ہے جس کے نتیجے میں ایک بچے سمیت 27 افراد ہلاک ہو چکے ہیں جبکہ 30 سے زائد افراد زخمی ہو گئے ہیں، پولیس نے علاقے کو گھیرے میں لے لیا ہے۔ فورسز کی جوابی فائرنگ میں حملہ آور کو بھی مار دیا گیا ہے۔ فوکس نیوز کی رپورٹ کے مطابق امریکی ریاست ٹیکساس کے فرسٹ بپٹسٹ چرچ میں ایک مسلح شخص نے اندھا دھند فائرنگ کر دی، فائرنگ کی زد میں آ کر 15 افراد ہلاک جبکہ متعدد افراد زخمی ہو گئے ہیں، چرچ سان انتونیو سے 35 میل کے فاصلے پر ہے۔ عینی شاہدین کے مطابق اتوار کی صبح 11 بجے چرچ میں مذہبی رسومات کی جا رہی تھیں کہ اس دوران تقریباً 11 بج کر 30 منٹ پر ایک مشتبہ شخص چرچ میں گھس آیا اور اس نے ہجوم پر فائرنگ کر دی جس سے کئی افراد ہلاک اور زخمی ہو گئے ہیں۔ واقعے کی فوری بعد ہیلی کاپٹرز اور ایمرجنسی گاڑیاں جائے وقوع پر پنچ گئیں اور واقعے میں ہلاک اور زخمی ہونے والے افراد کو چرچ سے ہسپتال منتقل کیا، فورسز کی فائرنگ سے حملہ آور کو بھی مار دیا گیا۔