اسلام آباد: وزیراعظم شہباز شریف نے حکومتی کارکردگی کو بھرپور انداز سے اجاگر کرنے اور اپوزیشن کی تنقید کا میڈیا و سوشل میڈیا پر بھرپور دفاع کرنے کے لیے ترجمانوں کی ٹیم میں اضافے کا فیصلہ جبکہ سوشل میڈیا کیلیے جامع حکمت کی منظوری دے دی۔
تفصیلات کے مطابق وزیراعظم کی زیر صدارت حکومتی ترجمانوں کا پہلا غیر معمولی اجلاس ہوا، جس میں کارکردگی میڈیا اور سوشل میڈیا پر بہتر انداز سے دکھانے کے لیے ترجمانوں کی ٹیم میں اضافے کا فیصلہ کیا گیا۔
وفاقی وزیر اطلاعات نے اجلاس میں میڈیا کی حکمت عملی پر تفصیلی بریفنگ دی اور ترجمانوں کی تعداد بڑھانے کی تجویز بھی پیش کی۔
اجلاس میں میڈیا کے محاذ پر چیلنجز، اپوزیشن کے بیانیے کا جواب دینے کے امور پر تفصیلی غور کیا گیا جبکہ جوابی بیانیے، بروقت ردعمل اور میڈیا حکمت عملی کے حوالے سے موثر تیاری کی تجاویز پر مشاورت کی گئی۔
ذرائع کے مطابق وزیراعظم نے وفاق اور صوبوں میں پارٹی اور حکومتی ارکان کو ترجمان بنانے کا فیصلہ کیا ہے۔ جس کے مطابق پارٹی کے سینئر اور نوجوان رہنما ترجمان بنیں گے، جو اپنے اپنے شعبوں کے حوالے سے میڈیا میں پارٹی اور حکومت کا دفاع کریں گے۔
اجلاس میں ٹی وی پروگراموں میں پارٹی ترجمانوں کو بھجوانے کے لئے سینٹرلائزڈ نظام بنانے پر اتفاق کیا گیا جبکہ سوشل میڈیا کے لئے جامع حکمت عملی کی بھی منظوی دی گئی۔
اس کے علاوہ اجلاس میں صوبائی اور وفاقی حکومتوں کے ترجمانوں کے درمیان اشتراک عمل قائم کرنے کی منظوری دے دی گئی، وزیراعظم نے میڈیا کے محاذ پر بھرپور جواب کے لئے نئے چہروں کو بھی موقع دینے اور آگے لانے کی ہدایت کر دی۔
اجلاس میں وفاقی وزیر اطلاعات عطااللہ تارڑ کے علاوہ سابق وفاقی وزیر اطلاعات، پارٹی کی سیکریٹری اطلاعات اور پنجاب کی سینئر وزیر مریم اورنگزیب، پنجاب کی وزیر اطلاعات عظمی زاہد بخاری، خیبرپختون خوا سے اختیار ولی، صوبہ سندھ سے کھیل داس کوہستانی بھی شریک تھے۔
