تقریباً تمام ہی انتخابی نتائج کے آ جانے کے بعد اب حکومت سازی کے لیے ملاقاتوں اور مشاورت کا سلسلہ جاری ہے۔
مسلم لیگ ن کی مرکزی رہنما اور ترجمان مریم اورنگ زیب نے ایک ٹوئیٹ میں بتایا ہے کہ متحدہ قومی موومنٹ پاکستان کا ایک وفد آج (اتوار کو) صبح ساڑھے گیارہ بجے رائے ونڈ میں مسلم لیگ ن کی مرکزی قیادت سے ملاقات کرے گا۔
ایم کیو ایم پاکستان کے وفد کی قیادت ڈاکٹر خالد مقبول صدیقی کر رہے ہیں۔ وفد مسلم لیگ کے قائد محمد نواز شریف سے ملاقات کریں گے۔ اس ملاقات میں حکومت سازی سے متعلق امور کے بارے میں تفصیلی تبادلہ خیال متوقع ہے۔
مریم اورنگ زیب نے اپنے ٹوئیٹ میں بتایا ہے کہ اس موقع پر سابق وزیر اعظم پاکستان مسلم لیگ ن کے صدر محمد شہباز شریف اور چیف آرگنائزر مریم نواز بھی موجود ہوں گی۔
یاد رہے کہ حکومت سازی کے لیے مسلم لیگ ن اور پاکستان پیپلز پارٹی کے درمیان بھی اعلیٰ ترین سطح پر رابطے ہو رہے ہیں۔
دوسری طرف آزاد امیدواروں نے بھی حکومت سازی یا پھر حکومت میں بڑا حصہ پانے کے لیے رابطے شروع کردیے ہیں۔ بیشتر آزاد امیدواروں کا تعلق غیر اعلانیہ تعلق پی ٹی آئی سے بتایا جارہا ہے۔
