حکومت نے عوام کو ریلیف دینے کے بجائے اپنا خزانہ بھرنے کا فیصلہ کرلیا۔ مشیر خزانہ شوکت ترین کہتے ہیں کہ حکومت ہر ماہ پیٹرولیم لیوی 4 روپے 95 پیسے بڑھائے گی۔ ان کا کہنا ہے کہ آئی ایم ایف سے معاملات طے پاگئے، کچھ رعایت لینے میں کامیاب ہوگئے۔
وزیر توانائی حماد اظہر کے ہمراہ اسلام آباد میں پریس کانفرنس سے خطاب کرتے ہوئے شوکت ترین نے کہا کہ پیٹرولیم ڈیولپمنٹ لیوی 30 روپے تک لے جانی ہے اس لئے ہر ماہ 4 روپے 95 پیسے بڑھائیں گے، پیٹرولیم ڈیولپمنٹ لیوی 356 ارب روپے وصول کی جائے گی۔
پیٹرولیم لیوی میں اضافے کے باعث عالمی سطح پر پیٹرولیم مصنوعات کی قیمتوں میں کمی کا فائدہ پاکستانی عوام کو نہیں ملے گا اور پرانی قیمت برقرار رہے گی۔
نہوں نے کہا کہ عالمی مالیاتی ادارے (آئی ایم ایف) سے مذاکرات طے پاگئے ہیں، ان مذاکرات میں ہم اپنے مؤقف پر کھڑے رہے، آئی ایم ایف سے کچھ رعایت لینے میں کامیاب رہے، عالمی ادارہ ایک ارب ڈالر قرض فراہم کرے گا۔
وزیراعظم کے مشیر برائے امور خزانہ نے مزید کہا کہ آئی ایم ایف کے ساتھ اسٹاف ایگریمنٹ کامیابی سے مکمل ہوا، عالمی مالیاتی ادارے نے ٹیکس اور توانائی کے شعبوں میں اصلاحات جاری رکھنے کا کہا ہے، ٹیکس اقدامات 700 ارب سے کم کرکے 350 ارب روپے پر لے آئے، حکومت اصلاحات کے ایجنڈے پر کامیابی سے عمل کررہی ہے۔
شوکت ترین نے مزید کہا کہ میں نے کہا تھا ٹیرف بڑھانا مسئلے کا حل نہیں ہے، قیمتیں بڑھائیں گے تو غریب کے اوپر دباؤ بڑھے گا، اے ڈی بی، ورلڈ بینک اور دیگر ممالک بھی وسائل دیں گے، آئی ایم ایف نے اسٹیٹ بینک میں اصلاحات اور ٹارگٹڈ سبسڈیز دینے کیلئے کہا ہے، عالمی ادارے نے تسلیم کیا کرونا کے باوجود معاشی ترقی جاری ہے۔
ان کا کہنا ہے کہ ٹیکس قوانین میں بہتری اور کاروبار میں آسانی پیدا کرنا ہوں گی، ہم نے 500 ملین ڈالر لئے تھے، معاہدے سے پیچھے ہٹنا مشکل ہوگیا تھا، اسٹیٹ بینک ایکٹ میں ترمیم ہم نے کرانی ہے، اسے خود مختاری دینے پر پہلے ہی اتفاق کرچکے تھے۔
مشیر برائے امور خزانہ نے مزید کہا کہ اسٹیٹ بینک ایکٹ کی ترمیم کرانی اور کرونا پیکیج پر آڈیٹر جنرل کی رپورٹ پیش کرنی ہے، مانیٹری پالیسی، ایکسچینج ریٹ پالیسی میں اسٹیٹ بینک آزاد ہوگا، اسٹیٹ بینک ترمیمی بل کی پارلیمنٹ سے منظوری لینا ہوگی، اسٹیٹ اون انٹرپرائز کی شفافیت میں اضافہ کرنا پڑے گا، سرکاری اداروں کی کارکردگی کو بہتر بنانا ہوگا۔
