نئے صدر 25جولائی کو حلف اُٹھائینگے

نئی دہلی (آئی این پی) حکمران جماعت بی جے پی کے امیدوار رام ناتھ کووند 65 فیصد ووٹ لے کر بھارت کے 14 ویں صدر منتخب ہوگئے وہ ،25 جولائی کو اپنے عہدے کا حلف اٹھائیں گے،وزیراعظم نریندر مودی نے رام ناتھ کو ملک کا صدر بننے پر مبارکباد دیتے ہوئے کہا کہ ارکان پارلیمنٹ اور مختلف ریاستوں کی جانب سے رام ناتھ کی حمایت کرنے پر خوشی ہوئی ہے۔جمعرات کو بھارتی میڈیا کے مطابق حکمران جماعت بھارتیہ جنتا پارٹی کے نامزد امیدوار رام ناتھ کووند 65 فیصد سے زائد ووٹ لے کر نئے بھارتی صدر منتخب ہوگئے ، صدارتی انتخابات میں اپوزیشن جماعت کانگریس کی جانب سے لوک سبھا کی پہلی خاتون اسپیکر میرا کمار کو امیدوار نامزد کیا گیا تھا جب کہ حکمران اتحاد نے مشترکہ طور پر اپنا صدارتی امیدوار بہار کے گورنر رام ناتھ کووند کو منتخب کیا تھا دونوں صدارتی امیدواروں کا تعلق دلت برادری سے ہے۔تاہم اب بی جے پی کی منافقت کھل کرسامنے آگئی ہے کیوں کہ رام ناتھ کووند کا تعلق ہندو انتہا پسند راشٹریہ سویم سیوک سنگھ (آر ایس ایس) سے بھی ہے بھارتیہ جنتا پارٹی اور آرایس ایس دونوں ہمیشہ سے دلتوں کے سخت خلاف رہے ہیں جب کہ ان کے خفیہ گروپ تاحال دلتوں کے خلاف سازشوں میں ملوث رہتے ہیں اور بھارتی وزیراعظم نریندر مودی نے25 کروڑ دلتوں کی حمایت حاصل کرنے کے لیے رام ناتھ کو صدارتی امیدوار نامزد کیا تھا۔