جعلی اکاﺅنٹس کیس: فالودے والے، کلرک، اسکول ٹیچر کے بعد دھوبی کی جعلی کمپنی

کراچی(ویب ڈیسک)فالودے والے، کلرک، اسکول ٹیچر اور فوت ہوئے شخص کے بعد اب دھوبی کا نمبر آگیا، ٹنڈو محمد خان کے دھوبی کے نام جعلی کمپنی نکل آئی۔’اپنی کمپنی’ کا علم خود دھوبی کو منی لانڈرنگ اور جعلی اکاﺅنٹس کی تفتیش کرنے والی مشترکہ تحقیقاتی ٹیم (جے آئی ٹی) سے ملے نوٹس سے ہوا۔25 ہزار قرض لے کر بغیر بینک اکاﺅنٹ کے کام کرنے والے طارق سعید کے چودہ طبق روشن ہوگئے۔ نوٹس کے مطابق اس کی کمپنی نے ایک کروڑ 40 لاکھ روپے کی لوہے کی خریداری بھی کی۔جے آئی ٹی نے طارق کو تفتیش کیلئے کراچی بھی طلب کیا ہے اور خریدوفروخت کے معاہدے کی کاپی، بلز اور بینک کی تفصیلات طلب کی ہیں۔طارق کا کہنا ہے کہ وہ مزدور آدمی ہے، اس کا کوئی بینک اکاﺅنٹ بھی نہیں ہے پھر وہ معاہدہ اور خرید وفروخت کی تفصیلات کہاں سے لائے گا۔خیال رہے کہ اس سے قبل اورنگی ٹاون کے فالودے شربت والے عبدالقادر کے اکاﺅنٹ میں دوارب 25 کروڑ روپے کی موجودگی کا انکشاف ہوا تھا۔عبدالقادر اکاﺅنٹ میں رقم کی منتقلی سے لاعلم رہا اور اس کا کہنا تھا کہ میں انگوٹھا چھاپ آدمی ہوں، اردو میں دستخط نہیں کرسکتا، انگریزی میں کیسے کروں گا؟اس کے علاوہ لاڑکانہ کے ایک طالب علم کے نام پر بھی بڑی تعمیراتی کمپنی نے اکاﺅنٹ کھولا اور اس اکاﺅنٹ میں 14-2013 کے دوران ڈیڑھ ارب روپے کی ٹرانسیکشنز ہوئیں تاہم طالب علم اس سے لاعلم تھا۔