شیخوپورہ میں غریبوں کیلئے پنجاب حکومت کی جانب سے فراہم کردہ راشن پٹواری فروخت کرنے لگے۔ پولیس نے ایک مکان پر چھاپہ مارکر راشن کے چوہتر بیگز برآمد کرکے پولیس ملازم سمیت پانچ ملزمان گرفتارکرلیے۔
شیخوپورہ کے تھانہ بی ڈویژن پولیس نے جب مکان پر چھاپہ مارا تو ملزمان سرکاری بیگز سے راشن نکال کر دوسرے بیگز میں منتقل کررہے تھے۔
پولیس کا کہنا ہے کہ ملزمان راشن کے تھیلے پٹواریوں سے خریدتے تھے، موقع سے پانچ ملزمان گرفتار کیے گئے جب کہ 3 موقع سے دیواریں پھلانگ کر فرار ہوگئے۔
واقعہ سے متعلق جب اسسٹنٹ کمشنر سے معلوم کیا گیا تو ضلعی انتظامیہ واقعہ سے لاعلم دکھائی دی۔ اسسٹنٹ کمشنر نے کہا کہ ہم اپنا ریکارڈ چیک کررہے ہیں۔
