وزیرِ اعظم شہباز شریف نے گوادر کے اپنے پہلے دورے کے دوران بارش سے متاثرہ افراد سے ملاقات کی اور انھیں ہر ممکن تعاون کی یقین دہانی کراتے ہوئے کہا کہ متاثرین کی بحالی کیلئے جامع پلان پیش کیا جائے گا۔ اس موقع پر انھوں نے اعلان کیا کہ مکمل تباہ مکان والے ہر خاندان کو ساڑھے سات لاکھ ملیں گے۔
وزیر اعظم شہباز شریف نے گوادر میں متاثرین اور میڈیا سے بات چیت کرتے ہوئے کہا کہ 26 فروری کو طوفانی بارشوں نے گوادر اور گردونواح میں تباہی مچادی، طوفانی بارش سے بلوچستان میں 5 افراد جاں بحق ہوئے۔
انھوں نے کہا کہ آپ کے گھرڈوب رہے ہیں میں اسلام آباد میں کیسے بیٹھ سکتا ہوں، اس لئے پہلی فرصت میں گوادرحاضر ہوا ہوں، میں یہاں فوٹو سیشن کےلیے نہیں آیا۔
ان کا کہنا تھا کہ متاثرین کی ریسکیو اور مدد میں کوئی کسرنہ چھوڑی جائے۔
شہباز شریف نے کہا کہ متاثرین کی ہر ممکن مدد کریں گے، متاثرہ مواصلاتی نظام کی بحالی پر کام کیا جائے گا۔
وزیر اعظم نے کہا کہ متاثرین کے تمام نقصانات پر ان کی مدد کریں گے، یہ آپ پر احسان نہیں بلکہ نومنتخب حکومت کا فرض ہے، مصیبت کے وقت اپنے بھائیوں کے ساتھ کھڑا ہونا چاہیے۔
اس سے قبل وزیرِ اعلیٰ بلوچستان سرفراز بگٹی اور دیگر شخصیات نے گوادر ایئر پورٹ پر وزیرِ اعظم شہباز شریف کا استقبال کیا تھا۔
وزیر اعظم گوادر میں بارش سے متاثرہ علاقوں کا معائنہ کریں گے، امدادی سرگرمیوں کا جائزہ لیں گے اور متاثرین کے لئے امدادای پیکج کا اعلان بھی کریں گے۔
جبکہ اہم شخصیات بھی وزیر اعظم شہباز شریف کے ہمراہ گوادر پہنچی ہیں۔
واضح رہے بلوچستان میں بارشوں کے نئے اسپیل کی انٹری ہو گئی ہے، جبکہ آفتزدہ قرار دیے گئے گوادر میں بادل ایک بار پھر برس پڑے ہیں، بارشوں کا سلسلہ 9 مارچ تک جاری رہے گا، صوبے کے سولہ اضلاع متاثر ہونے کا امکان، حکام نے الرٹ جاری کردیا۔
خیبرپختونخوا کے پہاڑی علاقوں میں کہیں کہیں بارش کی پیشگوئی، دیر، چترال، کوہستان، بٹگرام ، مانسہرہ، ایبٹ آباد میں بارش متوقع
