سندھ اسمبلی میں وزیر اعلی سندھ کے انتخاب کا عمل شروع ہوگیا۔
سندھ کے وزیرِ اعلیٰ کے انتخاب کے سلسلے میں سندھ اسمبلی کا اجلاس اسپیکر اویس قادر شاہ کی زیرِ صدارت آدھے گھنٹے کی تاخیر سے شروع ہوا، اجلاس کا آغاز تلاوت قرآن پاک سے ہوا۔
وزیر اعلی کا انتخاب اوپن بیلٹ کے ذریعے ہوگا، وزیر اعلی سندھ کے لیے پیپلز پارٹی کے مراد علی شاہ اور ایم کیو ایم کے علی خورشیدی مدمقابل ہیں۔
مراد علی شاہ کے حق میں رائے دینے والوں کو دائیں جانب جانے جبکہ علی خورشیدی کے حق میں رائے دینے والے بائیں جانب جانے کی ہدایت کی گئی ہے۔
وزیر اعلیٰ سندھ کی تقریب حلف برداری کل ہو گی
وزیر اعلیٰ سندھ کی تقریب حلف برداری کل شام ہو گی، مراد علی شاہ وزیر اعلیٰ سندھ کی حیثیت سے حلف اٹھائیں گے، حلف برداری کی تقریب گورنر ہاؤس میں شام 5 بجے ہوگی۔
نادر مگسی نے رکنیت کا حلف اٹھایا
اسپیکر سید اویس قادر شاہ نے نادر مگسی سے اسمبلی کی رکنیت کا حلف لے لیا۔
گزشتہ روز اسپیکر سندھ اسمبلی اویس قادر شاہ نے منتخب ہوتے ہی سندھ اسمبلی میں قائد ایوان کے لیے شیڈول کا اعلان کیا تھا۔
نو منتخب اسپیکر سندھ اسمبلی کے شیڈول کے مطابق وزیر اعلیٰ کے انتخاب کے لیے کاغذات نامزدگی کے لیے 2 سے 3 بجے کا وقت ہے، کاغذات نامزدگی کی جانچ پڑتال آج شام 6 بجے تک ہوگی جبکہ کل وزیر اعلیٰ کا انتخاب ہوگا۔
دوسری جانب وزیر اعلیٰ سندھ کے انتخاب کے لیے کاغذات نامزدگی جمع کرا دیے گئے۔
وزیر اعلیٰ سندھ کے انتخاب کے لیے مراد علی شاہ کے کاغذات نامزدگی جمع کرادیے گئے، پیپلزپارٹی ارکان غلام قادرچانڈیو، صالح شاہ اور نعیم کھرل نے مرادعلی شاہ کے کاغذات جمع کرائے۔
دوسری جانب متحدہ قومی موومنٹ پاکستان (ایم کیو ایم پاکستان) نے بھی وزیراعلیٰ سندھ کے عہدے کے لیے کاغذات نامزدگی جمع کروا دیے۔
وزیراعلیٰ سندھ کے عہدے کے لیے ایم کیوایم پاکستان کے امیدوار علی خورشیدی نے کاغذات نامزدگی جمع کرائے ہیں۔
