الیکشن کمیشن میں پاکستان تحریک انصاف (پی ٹی آئی) انٹرا پارٹی انتخابات کا کیس سماعت کے لیے مقرر کردیا گیا۔
الیکشن کمیشن میں پی ٹی آئی انٹرا پارٹی انتخابات کے خلاف درخواست پر سماعت 18 دسمبر کو ہوگی، الیکشن کمیشن نے چیئرمین پی ٹی آئی کو نوٹس جاری کرکے طلب کرلیا۔
چیف الیکشن کمشنر سکندر سلطان راجہ کی سربراہی میں 5 رکنی بینچ 10 بجے سماعت کرے گا، الیکشن کمیشن نے چیئرمین پی ٹی آئی گوہر خان کونوٹس بھیج دیا۔
الیکشن کمیشن نے چیئرمین پی ٹی آئی، پی ٹی آئی کے چیف الیکشن کمشنر نیاز اللہ نیازی، جنرل سیکرٹری عمر ایوب سمیت 9 عہدیداروں کو نوٹس بھیج دیا۔
پی ٹی آئی کے صدر بلوچستان منیر احمد بلوچ، صدر سندھ حلیم عادل شیخ، صدر پنجاب ڈاکٹر یاسمین راشد اور صدر خیبرپختونخوا علی امین گنڈاپو کو بھی نوٹسز جاری کیے گئے ہیں۔
ریٹرننگ آفیسر سنٹرل سیکرٹریٹ سردارمصروف خان اورخیبرپختونخواکے سنٹرل سیکرٹریٹ میں ریٹرننگ آفیسر انصرمحمود کو بھی نوٹس جاری کردیا گیا۔
الیکشن کمیشن میں پی ٹی آئی انٹرا پارٹی انتخابات کے خلاف 13 درخواستیں دائر ہوچکی ہیں، پاکستان تحریک انصاف کے حالیہ انٹرا پارٹی انتخابات کو الیکشن کمیشن میں چیلنج کیا گیا تھا، الیکشن کمیشن میں اکبر ایس بابر سمیت 13 افراد کی جانب سے درخواستیں دائر کی گئی ہیں۔
درخواست گزاروں کے وکلاء نے دلائل دیتے ہوئے کہا کہ تحریک انصاف کے انٹرا پارٹی انتخابات کو کالعدم قرار دیا جائے۔
ہم عوام پاکستان پارٹی نے انتخابی نشان بلے کے حصول کے لیے الیکشن کمیشن میں درخواست جمع کررکھی ہے۔
درخواست کے متن میں کہا گیا کہ تحریک انصاف انٹرا پارٹی الیکشن کا انعقاد میں ناکام رہی ہے، بلے کا انتخابی نشان خالی ہے، کسی پارٹی کو دیا گیا نہ ہی کسی پارٹی نے مانگا ہے۔
