ویسے تو پاکستان سمیت دیگر ممالک میں جھوٹ بولنا یا حقیقت کے برعکس گفتگو کرنا عام سمجھا جاتا ہے لیکن معروف آرٹیفیشل انٹیلیجنس (اے آئی) چیٹ بوٹ کی کمپنی اوپن اے آئی کا اپنے چیف ایکزیگٹو افسر کو برطرف کرنے کی وجہ آپ کو حیران کردے گی۔
اوپن اے آئی کے چیف ایگزیکٹو اور شریک بانی سیم آلٹمین کو ان کی اپنی ہی کمپنی سے اس وقت برطرف کر دیا گیا جب اس کے بورڈ نے ان پر الزام عائد کیا کہ وہ اپنی بات چیت میں مسلسل کھل کر بات نہیں کر رہے ہیں۔
آلٹمین کی برطرفی سلیکون ویلی میں ایک بڑا جھٹکا ہے، اوپن اے آئی کی جانب سے تیار کردہ انتہائی مقبول چیٹ بوٹ چیٹ جی پی ٹی کے اجراء کے بعد آلٹمین دنیا کے سب سے زیادہ نظر آنے والے ٹیک ایگزیکٹوز میں سے ایک اور مصنوعی ذہانت کے ماہر بن کر ابھرے ہیں۔
اوپن اے آئی کے مطابق کمپنی کے بورڈ کو اب سیم آلٹمین کی قیادت پر اعتماد نہیں اور کمپنی کے آگے بڑھنے کے لیے نئی قیادت کی ضرورت ہے، لہٰذا وہ کمپنی کے بورڈ کا بھی حصہ نہیں رہیں گے۔
کمپنی نے کہا کہ آلٹمین بورڈ کے ساتھ اپنی بات چیت میں مسلسل کھل کر بات نہیں کرتے تھے جس کی وجہ سے بورڈ کی ذمہ داریاں نبھانے کی صلاحیت متاثر ہوتی تھی جب کہ یہ واضح نہیں کہ انہوں نے کمپنی سے کونسی بات پوشیدہ رکھی تھی۔
