رجمان وزیر اعظم معاون خصوصی برائے سیاسی ابلاغ ڈاکٹر شہباز گِل نے کہا ہے کہ نالائق، کرپٹ اور مافیاوں کی حکومت نے سندھ کو برباد کردیا ہے۔
ڈاکٹر شہباز گِل نے مرتضیٰ وہاب کے بیان پر رد عمل دیتے ہوئے کہا کہ وفاق پر تنقید کر کے پیپلز پارٹی سندھ کی ابتر حالات پر پردہ ڈالنے کی ناکام کوشش کر رہی ہے، نالائق، کرپٹ اور مافیاوں کی حکومت نے سندھ کو برباد کردیا ہے۔
انہوں نے کہا کہ آئے روز سندھ سے بچوں کا بھوک، ایڈز اور خسرہ جیسی بیماریوں سے مرنے کی اطلاعات آتی ہیں، لیکن افسوس کہ سندھ کے حکمران خوابِ غفلت کی نیند سوئے ہوئے ہیں۔
ان کا کہنا تھا کہ کراچی کے نام پر کرپشن اور منی لانڈرنگ کے بادشاہ پر سیاست کر رہے ہیں، کراچی کے ابتر حالات کی ذمہ داران پچھلے 2 دہائیوں سے سندھ پر مسلط ہیں، زرداری مافیا نے ضلع غربی کراچی میں 15 ارب کی 310 ایکڑ سرکاری زمین ہتھیائی، کراچی میں 89 ہزار ایکڑ سرکاری زمین جبکہ 28 لاکھ فاریسٹ کی زمینوں پر قبضے ہیں۔
ترجمان وزیر اعظم معاون خصوصی برائے سیاسی ابلاغ ڈاکٹر شہباز گِل نے مزید کہا کہ کراچی کو حقوق دینے کی ابتداء تحریک انصاف حکومت نے کی، رواں مالی سال میں وفاقی حکومت کراچی ٹرانسفرمیشن پلان کیلئے 98 ارب رکھے گئے، جامشورو میں کوئلے سے بجلی پیدا کرنے کیلئے 22 ارب روپے رکھے گئے ہیں۔
واضح رہے کہ ایڈمنسٹریٹرکراچی مرتضیٰ وہاب نے میڈیا سے گفتگو کرتے ہوئے کہا تھا کہ آئل ٹرمینل کی بہتری کیلئے 26 کروڑکا ٹینڈرجاری کیا، ترقیاتی کاموں پر توجہ مرکوز کیے ہوئے ہیں۔
انہوں نے کہا کہ رواں مالی سال ڈیڑھ ارب روپے سڑکوں پر خرچ کریں گے ، عزیز بھٹی پارک کو بہترکرنے کا کام بھی جلد شروع کریں گے ، انفراسٹرکچر کی بہتری کیلئے 1.1 ارب کے ٹینڈرز پر کام جاری ہے، باغ کے دروازے پھر سے عوام کیلئے کھولے جا رہے ہیں۔
مرتضیٰ وہاب کا کہنا تھا کہ کراچی کی بہتری کیلئے اختیارات نہیں بہتری کا مسئلہ تھا، ہم نے فیریئر ہال کی تزئین وآرائش کا کام شروع کیا ہے ، فلائی اوورز پر پودے لگانے کا کام شروع کیا گیا ہے۔
ایڈمنسٹریٹر کراچی مرتضیٰ وہاب نے مزید کہا تھا کہ ہم نے کراچی میں اربن فاریسٹ کو فروغ دینا شروع کیا ، شہری فیرئیر ہال میں آکر تاریخی ورثے کو دیکھ سکتے ہیں۔
