اسلام آباد: ملک بھر میں انفارمیشن ٹیکنالوجی کے 30 مختلف منصوبوں کے لیے 18 ارب سے زائد کے فنڈز کی منظوری دے دی گئی۔
تفصیلات کے مطابق آج وفاقی وزیر آئی ٹی امین الحق کی زیر صدارت اجلاس میں وزارت آئی ٹی کی پالیسی کمیٹی نے مختلف منصوبوں کی مد میں اٹھارہ ارب روپے سے زائد کے فنڈز جاری کرنے کی منظوری دے دی۔
اجلاس میں سیکریٹری ڈاکٹر سہیل راجپوت، ممبر ٹیلی کام محمد عمر ملک، کیبنٹ اور فنانس ڈویژن کے نمائندگان شریک ہوئے، اجلاس میں وفاقی وزیر سید امین الحق نے کہا کہ یو ایس ایف کے قیام سے اب تک 100 فی صد اضافے کے ساتھ حکومت کے 3 برسوں میں 43 منصوبے شروع ہوئے۔
امین الحق کا کہنا تھا یونیورسل سروس فنڈ کی تیز ترین اور شان دار کارکردگی پر ادارے کے افسران و ٹیکنکل اسٹاف مبارک باد کے مستحق ہیں، شان دار کارکردگی کو شفافیت، معیار اور منصوبوں کی بروقت تکمیل، اور مانیٹرنگ نظام کے ساتھ برقرار رکھا جائے۔
انھوں نے ہدایت کی کہ وزیر اعظم عمران خان کی ہدایت کے تحت اہم سیاحتی مقامات پر براڈ بینڈ سروسز کی فراہمی کے منصوبوں کا فوری آغاز کیا جائے، اور آئندہ سیزن تک سیاحوں کے لیے شمالی علاقہ جات میں براڈ بینڈ سروسز کی فراہمی کو یقینی بنایا جائے۔
امین الحق کا کہنا تھا کہ ملک بھر میں یونین کونسلز کی سطح تک آپٹیکل فائبر کیبل پہنچانے کے مجوزہ منصوبے قابل اطمینان ہیں، ملک کی شاہراہوں پر بلاتعطل موبائل سروسز کی فراہمی اور فائیو جی سروسز کے لیے فائبر آپٹک نیٹ ورک ضروری ہے۔
وفاقی وزیر نے کہا چاروں صوبوں کے دور دراز علاقوں میں براڈ بینڈ اور آپٹیکل فائبر کے منصوبے ڈیجیٹل پاکستان ویژن کی تکمیل کے لیے کلید ہیں۔
