وفاقی وزیر تعلیم شفقت محمود نے کہا ہے کہ پنجاب کا نیا بلدیاتی نظام وزیراعظم عمران خان کی اولیں ترجیحات میں شامل ہے۔
تفصیلات کے مطابق وفاقی وزیر تعلیم شفقت محمود اور صوبائی وزیر قانون راجہ بشارت کی زیر صدارت وزیر اعلیٰ ہاؤس میں اجلاس ہوا جس میں میں پنجاب کے نئے بلدیاتی قانون کے تحت اختیارات اور اثاثہ جات کی منتقلی پہر غوروخوض مشاورت کی گئی۔
اجلاس میں صوبائی وزیر ہاؤسنگ میاں محمود الرشید ،صوبائی وزیر خزانہ ہاشم جواں بخت ، ایڈیشنل چیف سیکریٹری پنجاب شوکت علی، سیکریٹری خزانہ محمد عبداللہ سنبل، ایڈیشنل سیکریٹری لوکل گورنمنٹ محمد ارشد نے شرکت کی جبکہ ایڈیشنل چیف سیکریٹری لوکل گورنمنٹ طاہر خورشید نے قرنطینہ کی وجہ سے بذریعہ ویڈیو لنک شریک ہوئے۔
وفاقی وزیر کو پنجاب لوکل گورنمنٹ ایکٹ 2019ء پر بریفنگ دی گئی۔
ایڈیشنل چیف سیکریٹری لوکل گورنمنٹ طاہر خورشید نے کہا کہ اختیارات اور اثاثہ جات کی تقسیم اور منتقلی کے عمل پر کام جاری ہے جبکہ نئے بلدیاتی نظام کو وزیر اعظم اور وزیراعلیٰ پنجاب کے ویژن کے مطابق ڈھالنے کے لیے ہر اقدام کر رہے ہیں۔
وفاقی وزیر تعلیم شفقت محمود نے کہا کہ یہ نظام نچلی سطح پر عوام کو اختیارات کی منتقلی کا ضامن ہے، اختیارات اور اثاثہ جات کی منتقلی کا عمل خوش اسلوبی سے مکمل ہونا چاہیے جبکہ پنجاب کا نیا بلدیاتی نظام وزیراعظم عمران خان کی اولیں ترجیحات میں شامل ہے۔
اجلاس میں راجہ بشارت نے کہا کہ وزیر اعظم عمران خان نے پنجاب کے نئے بلدیاتی قانون کی تیاری میں بھرپور راہنمائی کی جبکہ نیا بلدیاتی قانون ہر لحاظ سے جامع اور عوامی امنگوں کے مطابق ہے۔
صوبائی وزیر قانون راجہ بشارت نے یہ بھی کہا کہ نئے بلدیاتی نظام میں تعلیم، صحت اور ہاؤسنگ سمیت متعدد شعبے لوکل گورنمنٹ کے پاس چلے جائیں گے۔
