سپریم کورٹ نے حکم دیا ہے کہ بلوچستان کے تمام ڈیمز تین سال کے اندر مکمل کیے جائیں ورنہ زمہ داروں کے خلاف کارروائی کی جائے گی۔
سپریم کورٹ کوئٹہ رجسٹری میں پانی کی قلت کیس کی سماعت کرتے ہوئے چیف جسٹس گلزار احمد نے کہا کہ بلوچستان میں پانی کی صورت حال بد سے بدترین ہوتی جارہی ہے۔ صوبائی حکومت کو اس کا کوئی ادراک ہے۔ کیا حکومت نے اس بحران کا کوئی سدباب کیا ہے۔
سیکرٹری پی ایچ ای نے عدالت کو بتایا کہ صوبے میں 5 ڈیمز مکمل جبکہ 4 اگلے سال مکمل ہوں گے۔ صوبے میں 100 ڈیمز کے منصوبے پر کام جاری ہے۔ 40 ڈیمز مکمل اور 60 پر تاحال کام جاری ہے۔ جب یہ سارے ڈیمزمکمل ہوجائیں گے تو پانی کی قلت ختم ہوجائے گی۔ چیف جسٹس نے حکم دیا کہ بلوچستان میں ڈیمز کی کوالٹی پر کوئی سمجھوتہ نہ کیا جائے۔ صوبے بھر میں بننے والے ڈیمز کی سہ ماہی کارکردگی رپورٹ بھی عدالت میں پیش کی جائے۔
عدالت نے ہدایت کی کوئٹہ سے 25 کلومیٹر کے فاصلے پر پی ایچ ای کے ٹیوب ویلز سے عوام کو پانی فراہم کرنے کا طریقہ کار وضح کیا جائے۔ بلوچستان کے تمام ڈیمز تین سال کے اندر مکمل کیے جائیں ورنہ زمہ داروں کے خلاف کارروائی کریں گے۔
جسٹس اعجاز الاحسن نے ایڈووکیٹ جنرل سے استفسار کیا کہ صوبے میں پانی ذخیرہ کرنے کےلئے کتنے ڈیمز ہیں اور نئے کتنے بنارہے ہیں۔ اس پر انہوں نے بتایا کہ اس وقت صوبے میں شادی کورڈیم، میرانی ڈیم بھرے ہوئے ہیں۔ صوبے کے ڈیمز تین سال کے پانی کی ضروریات پوری کرسکتے ہیں جس کے بعد کیس کی سماعت تین ماہ کیلئے ملتوی کردی گئی۔
