چیئرمین سینٹ صادق سنجرانی کا اسلامی فوجی اتحاد کے ہیڈ کوارٹر کا دورہ ، جنرل (ر ) راحیل شریف نے بریفنگ دی

ریاض (آئی این پی) چیئرمین سینٹ محمد صادق سنجرانی نے اپنے وفد کے ہمراہ اسلامی فوجی اتحاد برائے انسداد دہشت گردی (آئی ایم سی ٹی سی) کے ہیڈکوارٹر کا دورہ کیا۔ ہیڈ کوارٹرز میں آئی ایم سی ٹی سی کے کمانڈر جنرل راحیل شریف اور ڈپٹی کمانڈر جنرل عبدالرحمن نے وفدکا استقبال کیا۔ جنرل راحیل نے وفد کو آئی ایم سی ٹی سی کی کارکردگی اور اسکے اغراض و مقاصد پر تفصیلی بریفنگ دی۔ انھوں نے بتایا کہ اس ادارے کا بنیادی مقصد دہشت گردی کا مقابلہ کرنا اور اس کو ختم کرنا ہے۔ انھوں نے اس تاثر کی بھی نفی کی کہ یہ ادارہ کسی ملک ،قوم یا فر قہ کے خلاف کارروائی کیلئے بنایا گیا ہے۔چیئرمین سینٹ اور وفد میں موجود سینیٹرز نے دہشتگردی کے خاتمے کے لئے شاہ سلمان بن عبدالعزیز اور سعودی حکومت کے عزم اور کوششوں کو سراہا۔قبل ازیں چیئرمین سینٹ محمد صادق سنجرانی نے اپنے وفد کے ہمراہ مسک فاو¿نڈیشن(Foundation MISK)کا دورہ کیا۔ مسک کے سربراہ بدر الدین قاحیل نے چیئرمین سینٹ کا استقبال کیا اور انہیں فاو¿نڈیشن کے اغراض و مقاصد سے آگاہ کیا۔ انھوں نے بتایا کہ ولی عہد شہزادہ محمد بن سلمان مسک فاو¿نڈیشن کے بانی ہیں۔ مسک فاو¿نڈیشن کا مقصد سعودی نوجوانوں کو مستقبل کے چیلنجز سے نمٹنے کے لئے تیار کرنا ہے۔ فاﺅنڈیشن میں خاص طور پر تعلیم، ثقافت اور میڈیا کے میدان میں نوجوانوں کو تربیت دی جاتی ہے ۔ چیئرمین سینٹ کو مسک فاو¿نڈیشن کا تفصیلی دورہ کروایا گیا اور مختلف شعبوں میں ماہرین نے بریفنگ دی۔ چیئرمین سینٹ نے ولی عہد شہزادہ محمد بن سلمان کے وژن 2030 کی تعریف کی جس کے تحت نوجوانوں کو ترقی یافتہ ممالک کے معیار کی ٹریننگ دی جا رہی ہے۔ انھوں نے مسک کے کام کو بھی سراہا اور پاکستانی نوجوانوں کو بھی اس کاوش میں شامل کرنے کا اظہار کیا-چیئرمین سینٹ کے ہمراہ وفد میں سینیٹر ز احمد خان ، مرزا محمد آفریدی ،نصیب اللہ بازئی ، فدا محمد خان ، محمد طلحہ محمود ، دلاور خان ، خانزادہ خان، غوث محمد نیاز ی اور ایڈیشنل سیکرٹری سینٹ حفیظ اللہ شیخ بھی شامل ہیں۔