سابق صدر کی مقدمات سے خود کو بچانے کیلئے نئی چالیں،حیرت انگیز انکشافات .

کراچی (خصوصی رپورٹ) اپنے قریبی دوست انور مجید کی بیٹے سمیت گرفتاری سے پریشان سابق صدر آصف زرداری نئے پاکستان میں پرانی ڈیل کرنے کیلئے سرگرم ہو گئے۔ پی پی قیادت نے منی لانڈرنگ کیس میں محفوظ راستہ ملنے کے بدلے نئی حکومت سے تعاون پر آمادگی ظاہر کر دی، جب کہ وزرات عظمی کیلئے رائے شماری میں حصہ نہ لینے کا بھی فیصلہ کیا ہے۔ باخبر ذرائع کے مطابق تحریک انصاف اور مقتدر حلقوں سے بیک ڈور رابطوں میں تیزی آ گئی ہے تاہم اب تک پی پی قیادت اس ضمن میں کوئی یقین دہانی حاصل نہیں کر سکی۔ اس حوالے سے آئندہ 2 ہفتے بڑی اہمیت اختیار کر گئے ہیں۔ خصوصاً عیدالاضحیٰ کے بعد صورتحال واضح ہونا شروع ہو جائے گی۔ دوسری جانب نواز لیگی رہنماﺅں کا کہنا ہے کہ ہمیں زرداری صاحب کی پریشانیوں کا اندازہ ہے۔ وہ کوئی رعایت حاصل کر سکتے تو ہمیں کوئی اعتراض نہیں۔ تفصیلات کے مطابق منی لانڈرنگ کیس کی انکوائری میں دن بدن ہونے والی پیشرفت اور اومنی گروپ کے سربراہ انور مجید کی بیٹے سمیت گرفتاری کے بعد پیپلز پارٹی کی قیادت بیک فٹ پر آ گئی ہے۔ ذرائع کا کہنا ہے کہ 25 جولائی کو ہونے والے عام انتخابات میں آصف علی زرداری کو مشترکہ امیدوار بنانے، پنجاب اور کے پی کے میں صوبائی وزراتوں میں حصہ دینے، سینیٹ کے امور میں پیپلز پارٹی کو زیادہ اہمیت دینے اور قائد ایوان بھی جیالے کو بنانے جیسی شرائط پیش کیں۔ ذرائع کا مزید کہنا ہے کہ تحریک انصاف کے سینئر رہنما بھی اپوزیشن خصوصاً نواز لیگ کو کمزور کرنے اپنی وفاقی حکومت کو مضبوط کرنے کیلئے پیپلز پارٹی کے ساتھ بہتر ورکنگ ریلیشن شپ رکھنے کے حامی ہیں اور خصوصاً بلاول بھٹو زرداری سے بات چیت کرنے کیلئے تیار ہیں۔