فر قہ وارانہ فساد کی سازش ،اہم درگاہ کو آگ ،تشو یشنا ک صور تحا ل پیدا

لاہور (چودھری اسلم سے) یتیم خانہ چوک کے قریب نواں کوٹ ملتان روڈ میں درگاہ حضرت پیر سید سکندر شاہ کو نذر آتش کردیا گیا۔ پولیس نے موقع پر پہنچ کر قابو پا لیا۔ لحد پر پڑی چادر مکمل جل کر راکھ ہوگئی۔ تفصیلات کے مطابق لاہور میں مزارات کو نذرآتش کرنے کا سلسلہ چل نکلا ہے۔ بم دھماکوں کے بعد کئی مذاکرات کو نذرآتش کرنے کی کوشش کی گئی۔ اس سے قبل اکبری منڈی کے باہر شاہ محمد غوث قادری کے مزار کو نذرآتش کیا گیا۔ گزشتہ روز پیر سید سکندر شاہ کے مزار مبارک کو نذر آتش کرنے کی کوشش کی گئی۔ نامعلوم افراد نے منصوبے کے تحت آگ لگائی اور فرار ہوگئے جبکہ درگاہ میں آگ بھڑکتے ہی شعلے بلند ہوئے تو اردگرد کے لوگ اکٹھے ہوگئے۔ پولیس کو اطلاع کی گئی جس کے ساتھ مل کر لوگوں نے آگ پر قابو پایا۔ پولیس نے جلنے والی چادر بطور ثبوت اپنے قبضے میں لے لی۔ محمد صدیق کی مدعیت میں پولیس نے مقدمہ نمبر 114/18 درج کرلیا۔ پیر سید سکندر شاہ کے نام پر وہاں ایک بڑی کالونی بھی آباد ہے۔ نیااخبار سے گفتگو کرتے ہوئے حاجی صدیق‘ حاجی رحمت علی‘ حیدر علی‘ سابقہ کونسلر رضیہ بی بی نے بتایا کہ یہ پہلا واقعہ نہیں‘ نامعلوم افراد نے مزار مبارک کو تیسری بار نذرآتش کرنے کی کوشش کی ہے جبکہ اوقاف کا عملہ نذرانے کے لئے بے تاب رہتا ہے لیکن مزار مبارک پر سکیورٹی کا کوئی انتظام نہیں۔ بار بار شکایت کی گئی لیکن کسی نے توجہ نہ دی۔ پولیس کے مطابق نامعلوم افراد کی طرف سے آگ فرقہ واریت پھیلانے کا گھناﺅنا منصوبہ ہے تاکہ امت مسلمہ کو لڑا کر کمزور کیا جاسکے اور انتشار پیدا کیا جاسکے۔ مقدمہ کے تفتیشی سب انسپکٹر مختار ہیں۔