لاہور (نیا اخبار رپورٹ) جعلی پولیس مقابلوں کے ماسٹر پولیس افسران کے خلاف دو اہم اداروں نے انکوائریاں شروع کر دیں۔ پنجاب پولیس سے تعلق رکھنے والے 5 ایس پی 2 ایس ایس پی، 24 ڈی ایس پی اور 21 ایس ایچ اوز کے حوالے سے یہ انکوائری کی جا رہی ہے کہ انہوں نے پولیس مقابلوں میں جن لوگوں کو مارا ہے کیا وہ واقعی مجرم تھے؟ کیا ان کے مقابلے اصلی تھے؟ اسی طرح ایسی تمام جوڈیشل انکوائریاں جو ان مقابلوں کے حوالے سے ہوئی ہیں ان کا ریکارڈ بھی منگوا لیا گیا ہے اور ان میں جو مشکوک مقابلے ہیں ان پولیس مقابلوں میں ہلاک ہونے والے افراد کے لواحقین سے بھی اہم اداروں کے ذمہ داران نے ملاقاتوں کا سلسلہ شروع کر دیا ہے۔ باوثوق ذرائع نے کہا ہے کہ لاہور، شیخوپورہ، گجرات، اوکاڑہ، گوجرانوالہ، قصور، ساہیوال اور فیصل آباد میں تعینات رہنے والے پولیس افسروں کی زیادہ تعداد کی انکوائریاں کی جا رہی ہیں اور سب سے زیادہ پنجاب کے اندر پولیس مقابلے بھی انہی شہروں میں ہوئے ہں۔ ان شہروں میں سی آئی اے میں تعینات پولیس مقابلے کے ماسٹر اہم پولیس افسران کے حوالے سے علیحدہ ڈیٹا بنایا جا رہا ہے کہ وہ پولیس مقابلوں کے بعد کس قدر امیر ہوئے اور ان کی جائیدادیں کس قدر بڑھ گئیں۔ ذرائع کے مطابق پنجاب سے تعلق رکھنے والے ابتدائی طور پر دو سیاسی جماعتوں کے لیڈروں کی ان پولیس افسران کو آشیرباد کے حوالے سے بھی اہم ثبوت ملے ہیں اور یہ بھی ثبوت حاصل کئے گئے ہیں کہ کئی ایسے پولیس مقابلے بھی ہوئے ہیں جس میں مرنے والوں پر مقدمات تو موجود تھے مگر ان کو پکڑ کر اس لئے مار دیا گیا کہ ان سے ملنے والی ریکوری اس قدر زیادہ تھی کہ اس کی لالچ میں اس ریکوری کو کہیں عدالت میں نہ پیش کرنا پڑے۔ رپورٹ میں تو یہ بھی کہا گیا ہے کہ 13 پولیس افسران ایسے ہیں جن کی تنخواہ سے کئی گنا زیادہ مہنگے سکولوں میں دوسرے ممالک میں ان کے بچے پڑھتے ہیں یہ خرچے کس طرح پورے ہوتے ہیں اس کے حوالے سے بھی ان کے ذرائع آمدن رپورٹ میں لکھے گئے ہیں یہ بھی لکھا گیا ہے کہ پنجاب میں کئی بڑے گینگز جو سیاسی جماعتوں کیلئے بھی کام کرتے ہیں کئی پولیس افسران تو ان گینگز کے سرکردہ لیڈروں کے کہنے پر ان کے مخالفین کو پولیس مقابلوں میں مارتے ہیں۔
