روسی صدر کی بیٹی کو طلاق دینے والا بڑی مشکل میں پھنس گیا

ماسکو(ویب ڈیسک)گزشتہ دنوں روسی صدر ولادی میر پیوٹن کے داماد نے ان کی بیٹی کو طلاق دے دی جس پر اسے ایسی سخت ترین سزا کا سامنا کرنا پڑگیا ہے کہ جان کر ہر مرد کے ہوش اڑ جائیں۔میل آن لائن کی رپورٹ کے مطابق 35سالہ کھرب پتی کریلی شیمالوف نے لندن کی ایک حسینہ کے ساتھ شادی کے لیے اپنی اہلیہ کترینا تیخونووا کو طلاق دی جس پر سزا کے طور پر شیمالوف کو اپنی آدھی دولت سے ہاتھ دھونے پڑ گئے ہیں، جو اربوں میں بنتی ہے۔ رپورٹ کے مطابق صدر پیوٹن کی بیٹی 31سالہ کترینا ’راک اینڈ رول ڈانسر‘ ہے اور اب تک ڈانس کے کئی مقابلوں میں حصہ لے چکی ہے۔ تاہم وہ ہمیشہ دنیا سے مخفی رہی ہے اور اتنی طاقتور شخصیت کی بیٹی ہونے کے باوجود لوگوں کو اس کی زندگی کے بارے میں کچھ زیادہ معلومات حاصل نہیں ہیں۔شیمالوف نے لندن کی جس حسینہ کے لیے کترینا کو طلاق دی ہے اس کا نام زانا وولکووا ہے اور اعلیٰ سماجی مرتبے کی حامل خاتون ہے۔اس سے قبل وہ روس کی ایک اعلیٰ حکومتی شخصیت کی بیوی تھی تاہم اب طلاق یافتہ ہے۔ گزشتہ سال ویلنٹائنز ڈے پر شیمالوف اور زانا کی ایک پارٹی میں رقص کرتے ہوئے تصاویر بھی منظرعام پر آئی تھیں۔واضح رہے کہ شیمالوف اور کترینا کی شادی 2013ءمیں ہوئی تھی۔ شیمالوف صدر پیوٹن کے انتہائی قریبی اور دیرینہ دوست نکولے شیمالوف کا بیٹا ہے۔