لاہور (تجزیہ نگار) شریف برادران اس وقت سعودی عرب میں عجیب صورتحال سے دوچار ہیں۔ شہباز شریف چار جبکہ نوازشریف دو دن سے سعودی عرب میں موجود ہیں لیکن ابھی تک وہ کسی بھی اہم سعودی شخصیت سے ملاقات میں کامیاب نہیں ہو سکے۔ شہباز شریف پہلے مدینہ، پھر مکہ گئے۔ عمرہ کرنے کے بعد وہ بھی اتوار کو سعودی دارالحکومت ریاض میں اپنے بھائی کے ساتھ جا ملے ہیں اور دونوں بھائی سعودی حکام سے ملاقات کے لئے لائحہ عمل تیار کر رہے ہیں۔ وہ جن شخصیات سے ملاقات کے خواہشمند ہیں ان میں ولی عہد شہزادہ محمد بن سلمان بھی شامل ہیں۔ اطلاعات بھی ہیں کہ سعودی حکومت نے نوازشریف کو طلب کیا ہے اس کے باوجود وہ ملاقاتوں میں کامیاب نہیں ہو سکے۔ مبصرین کے مطابق ایک وقت تھا کہ سعودی حکمران نوازشریف کے لئے دیدہ و دل فرش راہ کئے ہوتے تھے اور ان کے استقبال کے لئے اہم ترین شخصیات ایئرپورٹ پر جاتی تھیں مگر اب وہ دارالحکومت میں موجود ملاقاتوں کے منتظر ہیں مگر ابھی تک انہیں وقت نہیں مل سکا اور وہ مسلسل انتظار میں ہیں۔ ذرائع کے مطابق امکان ہے کہ آج ان کی کسی شخصیت سے ملاقات ہو سکتی ہے۔
