جنرل جنجوعہ نے نواز شریف کو تحریک نہ چلانے کا مشورہ دیاہے: حامد میر

اسلام آباد (مانیٹرنگ ڈیسک) شہباز شریف کے سعودیہ جانے کا تعلق این آر او یا پاکستانی سیاست سے نہیں بلکہ پاکستان کے
سکیورٹی معاملات سے ہے۔ نیشنل سکیورٹی ایڈوائزر نے نواز شریف کو سمجھانے کی کوشش کی، فوج نے جواب تو سعد رفیق کو دیا تاہم اس کے ذریعے پیغام بہت سے لوگوں کو دیا ہے۔ یہ انکشافات سینئر صحافی نے نجی ٹی وی سے گفتگو کرتے ہوئے کئے۔ انہوں نے کہا کہ جنرل (ر)جنجوعہ نے نواز شریف کو سمجھایا ہے کہ اگر آپ تحریک چلائیں گے تو مقابلے میں بھی تحریک چلے گی اور بڑا حادثہ ہو سکتا ہے۔ موجودہ حالات میں فوج یا عدلیہ سمیت کوئی ادارہ بھی این آر او کرنے کی پوزیشن میں نہیں ہے۔ نواز شریف اگر این آر او میں کامیاب ہو بھی جاتے ہیں تو ان کی پارٹی کا قلع قمع ہو جائے گا۔ نواز شریف سازش کی جن کہانیوں کا ذکر کرتے ہیں وہ جنرل (ر) راحیل شریف کے حوالے سے ہیں۔ جنرل قمر جاوید باجوہ کے حوالے سے ان کے پاس سازش کی کوئی کہانی نہیں ہے۔ نواز شریف نے سازش کی کہانیاں شروع کیں تو ایسا نہ ہو کہ تین چار ماہ میں ہونے والی کچھ بڑی سازشوں کی کہانیاں بھی سامنے آ جائیں اور خود ان کے پاس کوئی جواب نہ ہو۔ سینئر صحافی نے کہا کہ سازش کی سب سے بڑی کہانی جس کے پاس ہے وہ بڑے صبرکا مظاہرہ کر رہا ہے اسے مجبور نہ کیا جائے تو سب کےلئے بہتر ہوگا۔