نئی دہلی: (ویب ڈیسک) بھارت میں پولیس اہلکار نے اپنے ہی 4 ساتھیوں کو ہلاک کر دیا۔ غیر ملکی میڈیا کے مطابق بھارتی ریاست چھتیس گڑھ کے ضلع بیجاپور کے سینٹرل ریزرو پولیس فورس کے کیمپ میں پولیس اہلکار نے ساتھیوں پر فائر کھول دیا، جس سے 4 پولیس اہلکار ہلاک اور ایک زخمی ہو گیا۔ ہلاک ہونے والے 4 اہلکاروں میں سے تین فائرنگ کرنے والے اہلکار سے عہدے میں سینئر تھے۔ فائرنگ کرنے والے اہلکار کو گرفتار کر لیا گیا تاہم ساتھیوں کے قتل کی وجوہات سامنے نہیں آسکیں۔ گولی چلانے والے اہلکار کی شناخت ساننت کمار کے نام سے ہوئی ہے۔ یاد رہے کہ چھتیس گڑھ کا ضلع بیجاپور شورش زدہ علاقہ ہے جہاں نکسل آزادی کی جدوجہد جاری ہے۔
