نیلسن منڈیلا کے پوتے مانڈلا منڈیلا قبول اسلام کے بعد مدینہ سے لاہور پہنچ گئے

لاہور (آئی این پی) جنوبی افریقہ کے رکن پارلیمنٹ اور سابق صدر نیلسن منڈیلا کے پوتے مانڈلا منڈیلا کے قبول اسلام کے بعد مدینہ سے لاہور پہنچ گئے، ان کا شاندار استقبال کیا گیا، مانڈلا منڈیلا نے کہا انٹرنیشنل کرکٹ کی بحالی کے ساتھ ہی پوری کوشش کر ونگاکہ دونوں ممالک آپس میں کرکٹ کھیلیں، جلد ہجنوبی افریقہ کی ٹیم پاکستان آئے گی۔ جمعرات کو لاہور کے علامہ اقبال ایئرپورٹ پر مانڈلا منڈیلا کے استقبال کے لیے پاکستان عوامی تحریک (پی اے ٹی) کے سربراہ ڈاکٹر طاہر القادری کے صاحبزادے محی الدین اور پی اے ٹی رہنما خرم نواز گنڈا پور سمیت دیگر افراد موجود تھے۔ ایئرپورٹ پر میڈیا سے گفتگو کرتے ہوئے مانڈلا منڈیلا نے کہا کہ پاکستان آکر بہت خوشی ہورہی ہے۔ جنوبی افریقہ میں رگبی اور فٹ بال کے ساتھ کرکٹ بہت شوق سے کھیلی جاتی ہے، پاکستان میں انٹرنیشنل کرکٹ سے پابندیاں ہٹنے کے ساتھ ہی وہ بطور رکن پارلیمنٹ پوری کوشش کریں گے کہ دونوں ممالک آپس میں کرکٹ کھیلیں۔