سعد حریری 20 روز بعد لبنان پہنچ گئے، صدر مشیل عون سے ملاقات

بیروت (این این آئی) لبنان کے مستعفی وزیراعظم سعدحریری 20 روز بعد بدھ کی صبح اپنے وطن واپس پہنچ گئے۔ غیرملکی خبررساں ادارے کے مطابق سعد حریری نے 4نومبر کو سعودی عرب میں وزیر اعظم کے عہدے سے استعفیٰ دے دیا تھا، وہ استعفیٰ دینے کے 3ہفتے بعد لبنان واپس پہنچے ہیں۔مستعفی وزیراعظم سعد حریری نے وطن واپس پہنچنے کے بعد لبنان کے صدر مشیل عون سے ملاقات کی،اس ملاقات کی تفصیلات منظر عام پر نہیں لائی گئیں تاہم ذرائع کے مطابق صدرمشیل عون نے مستعفی وزیراعظم سے اپنا استعفی واپس لینے اورملکی باگ ڈوردوبارہ سنبھالنے کی درخواست کی ہے جس کا ابھی تک سعدحریری نے جواب نہیں دیا،واضح رہے کہ لبنان کے صدر نے مستعفی وزیراعظم سعدحریری کا استعفیٰ قبول نہیں کیا ہے،سعد حریری نے وطن واپس پہنچنے کے بعد ملک کی جشن آزادی کی تقریب میں بھی شرکت کی اس موقع پر ان کے ہمراہ صدرمشیل عون اوردیگر اعلیٰ حکومتی وعسکری حکام تھے۔