امریکہ ک خالی باتیں بند کرے ٹھوس اطلاعات دے اب پراکسی وار نہیں ہو گی

اسلام آباد (آئی این پی) وزیر خارجہ خواجہ محمد آصف نے واضح کیا ہے کہ کسی بیرونی طاقت کے مفادات کےلئے خارجہ پالیسی تشکیل نہیں دیں گے، امریکہ پاکستان کو قصور وار ٹھہرا کر افغانستان میںاپنی ناکامی سے پردہ پوشی کر رہا ہے، پاکستان اب کی پراکسی وار میں شامل نہ ہونے کی پالیسی پر عمل پیرا ہے، علاقائی امن کے لیے شنگھائی تعاون تنظیم(ایس سی او)کے پلیٹ فام کو بھرپور طریقے سے استعمال کریں گے،امریکہ کو واضح پیغام دیا ہے کہ پاکستان بھارت کا خطے میں پولیس مین کا کردار قبول نہیں کرے گا، ماضی کی طرح بزدلانہ رویہ امریکہ کے ساتھ نہیں رکھیں گے اور پاکستان کی سلامتی اور وقار مقدم ہو گا، نئی امریکی پالیسی کا ڈھانچہ ان جرنیلوں نے بنایا جنہوں نے افغانستان میں ہزیمت اٹھائی، امریکہ پر واضح کر دیا ہے کہ نئی پالیسی بہتر ثابت نہیں ہو سکتی۔وہ بدھ کو سینیٹ میں امریکی وزیر خارجہ کے حالیہ دورے جنوبی ایشیاءپر جاری بحث سمیٹ رہے تھے۔وزیر خارجہ خواجہ محمد آصف نے کہا کہ پاکستان کے امریکہ کے ساتھ تعلقات زیادہ خوشگوار نہیں ہیں، امریکہ کے ساتھ تعلقات بہتری کےلئے مشترکہ گراﺅنڈ ڈھونڈ رہے ہیں تاکہ افغانستان کے مسئلے کے حل کےلئے کوئی مشترکہ لائحہ عمل اختیار کیا جا سکے۔انہوں نے کہا کہ امریکہ سے کہا تھا کہ وہ قابل عمل انٹیلی جنس دیں تو کارروائی کریں گے، محض خالی خولی بات نہ کریں، امریکہ کو واضح انداز میں پیغام دیا جا چکا ہے کہ پاکستان بھارت کا خطے میں پولیس مین کا کردار قبول نہیں کرے گا، ماضی کی طرح بزدلانہ رویہ امریکہ کے ساتھ نہیں رکھیں گے اور پاکستان کی سلامتی اور وقار مقدم ہو گا۔خواجہ آصف نے کہا کہ ایران ، چین، روس سمیت علاقائی ممالک کے ساتھ افغانستان کے مسئلہ کے حل کےلئے مل کر کام کرنے کےلئے ملاقاتیں کی ہیں۔خواجہ آصف کا کہنا تھا کہ ہم کوشش کر رہے ہیں کہ علاقائی ممالک مل کر حل تلاش کر کے علاقائی امن کو یقینی بنائیں کیونکہ امریکا آج ہے کل یہاں نہیں ہو گا۔ پاکستان اب کی پراکسی وار میں شامل نہ ہونے کی پالیسی پر عمل پیرا ہے۔انہوں نے مزید کہا کہ ہم علاقائی امن کے لیے شنگھائی تعاون تنظیم(ایس سی او)کے پلیٹ فام کو بھرپور طریقے سے استعمال کریں گے اور کوشش ہے کہ مشترکہ گراﺅنڈ افغان مسئلے کا حل تلاش کر سکیں ۔