گوروں کو منہ توڑ جواب ،پاکستانی نوجوان نے بلیو وہیل گیم کو ایسا توڑ نکال لیا کہ جان کر ہر پاکستانی فخر محسوس کریگا

لاہور(مانیٹرنگ ڈیسک) قاتل گیم بلیو وہیل کا اس وقت دنیا بھر میں شہرہ ہے، جس کی وجہ سے اب تک درجنوں نوجوان موت کے منہ میں جا چکے ہیں، اب اس قاتل گیم کے جواب میں ایک پاکستانی نوجوان نے بھی ایک گیم بنا ڈالی ہے، اور اس میں کھلاڑیوں کیلئے ایسی ٹاسکس رکھی ہیں کہ پوری دنیا اس نوجوان کی تعریف پر مجبور ہوگئی ہے، ویب سائٹ ” پڑھ لو “ کی رپورٹ کے مطابق 18سالہ وسیم گل نے جو ایپلی کیشن بنائی ہے وہ بالکل بلیو وہیل کی اپیلی کیشن جیسی دکھائی دیتی ہے لیکن اس میں کھلاڑیوں کو ایسے کام کرنے کیلئے کہا جاتا ہے جن سے ان پر زندگی کی اہمیت اجاگر ہوتی ہے اور کھلاڑی کی زندگی میں مثبت تبدیلیاں لانے کا باعث بنتی ہے ، رپورٹ کے مطابق اس گیم میں دی گئی ٹاسکس میں 10پش اپس لگائیں ، صبح 6بجے بیدار ہوں، جب بیدار ہوں تو 10منٹ تک بستر سے مت نکلیں اور اپنی ناک کو سیدھے ہاتھ کے انگوٹھے سے چھوئیں، وغیرہ شامل ہیں، اس میں کچھ مزاحیہ ٹاسکس بھی شامل ہیں ، مثلاً ایک پیاز کاٹیں اور اس دوران کوشش کریں کہ آپ کی آنکھوں سے پانی نہ بہے ، ایک چھوٹا کیک کھائیں اور اس کے بعد انگلیوں اور ہونٹوں کو مت چاٹیں وغیرہ وغیرہ ، اس گیم میں کچھ ایسی ٹاسکس ہیں جن میں دوسروں کی مددکرنے کو کہا جاتا ہے ، مثلا ً گھر کے کام کاج میں اپنے والدین کا ہاتھ بٹائیں، اردگرد موجود لوگوں کی مدد کریں، آج کچھ خاص کریں، کسی غریب کو کھانا کھلائیں وغیرہ وغیرہ ، یہ گیم بھی بلیو وہیل کی طرح 50دن پر مبنی ہے، 50وین روز کھلاڑی کو سمارٹ بلیو وہیل کا خطاب مل جاتا ہے اور اسے مثبت زندگی کیلئے کچھ مزید نصیحتیں کی جاتی ہیں۔