”ضیا شاہد نے صحافت کو نئی سمت پر گامزن کیا ،خدمات ناقابل فراموش ہیں “

اسلام آباد (سید انوار زیدی سے) ضیاءشاہد نے صحافت کو ایک نئی سمت پر گامزن کیا اس سے پہلے صحافت برائے صحافت نہیں تھی لیکن انہوں نے ہر طبقہ فکر کو نہ صرف اپنے اخبار میں جگہ دی بلکہ ان کی حقیقی ترجمانی کی اور حقائق کو بغیر لگی لپٹی رکھے عوام تک پہنچایا۔ ان خیالات کا اظہار پاکستان مسلم لیگ (ن) کے سینئر ترین لیڈر سینیٹر راجہ ظفرالحق نے نمائندہ خبریں سے ایک گفتگو کے دوران کیا انہوں نے کہا کہ ضیاءشاہد ایک انتہائی مدبر اور بیباک صحافی ہیں انہوں نے ہمیشہ صحافتی اقدار کی حرمت کو مقدم رکھا اور آج بھی وہ ان ہی اصولوں کے مطابق اپنے قلم کی سیاہی کو ان سیاہ کاروں کے خلاف استعمال کررہے ہیں جو اس ملک کی سلامتی کو کسی بیرونی طاقت کے ایجنڈے پر نقصان پہنچانے کے درپے ہیں انہوں نے کہا کہ ضیاءشاہد کی 50 سالہ صحافتی زندگی کا سفر اس بات کی گواہی دے رہا ہے کہ انہوں نے قلم کی تلوار کی دھار سے ہر ظلم کا راستہ کاٹا اور مظلوم کی آواز بن کر ظالم کے ظلم کو بے نقاب کیا۔