شاہ سلمان دستبردار ؟نیا سعودی حکمران کون ؟

ریاض (ویب ڈیسک) سعودی عرب میں دو معروف علماءسمیت 20افراد کو حکومت پر تنقید کرنے کے الزام میں گرفتار کرلیا گیا ہے۔ گرفتار ہونے والے علماءکے نام سلمان العودہ اور عود القرنی بتائے گئے ہیں۔ مڈل ایسٹ آئی کی رپورٹ کے مطابق ان افراد کی گرفتاریاں ایسے وقت میں سامنے آئی ہیں جب ملک میں افواہیں گردش کررہی ہیں کہ سعودی فرماں روا شاہ سلمان، ولی عہد شہزادہ محمد بن سلمان کے حق میں بادشاہت سے دستبردار ہونے والے ہیں۔ ذرائع کے مطابق گزشتہ 24گھنٹوں میں کریک ڈاﺅن میں گرفتار ہونے والوں میں شاہ فہد کا بیٹا شہزادہ عبدالعزیز بن فہد السعود بھی شامل ہے۔ عودہ نامی عالم حکومت پر شدید تنقید کرنے اور لوگوں کو حکومت کے خلاف اکسانے کے جرم میں 1994سے 1999تک قید کی سزا کاٹ چکے ہیں۔ عودہ کے پیروکار بڑی تعداد میں موجود ہیں اور ٹوئٹر پر بھی انہیں 1کروڑ 40لاکھ لوگوں نے فالو کررکھا ہے ذرائع کے مطابق اس بار انہیں سعودی عرب اور قطر کے تنازع کے بارے میںایک ٹویٹ کرنے پر گرفتار کیا گیا ہے۔ اس ٹویٹ میں انہوں نے سعودی اور قطری حکام کے درمیان ہونے والی فون کال پر بات کی تھی جس کے منظرعام پر آنے کے بعد تنازعہ حل کی طرف جانے کی بجائے مزید سنگین ہوگیا ہے۔