آئند ہ اعزازی ڈگریوں کی رجسٹریشن ہو گی یا نہیں ، دیکھئے خبر

لاہور (خصوصی رپورٹ) پاکستان میڈیکل اینڈ ڈینٹل کونسل نے اعزازی طور پر حاصل کی جانے والی پوسٹ گریجوایشن ڈگریوں کی رجسٹریشن پر پابندی عائد کردی ہے۔ ایسے ڈگری ہولڈرز ڈاکٹروں کو میڈیکل کالجز میں ٹیچنگ فیکلٹی کے طور پر بھرتی نہیں کیا جاسکے گا۔ مستقبل میں تمام پوسٹ گریجوایٹ ڈاکٹروں سے بیان حلفی لینے کی تجویز ہے کہ انہوں نے امتحان دے کر یہ پوسٹ گریجوایشن ڈگری حاصل کر رکھی ہے۔ اگر کسی شخص نے غلط بیانی کی تو پی ایم ڈی سی کی رجسٹریشن منسوخ کرسکتی ہے۔ باوثوق ذرائع کے مطابق اس وقت بہت سے ڈاکٹرز ہیں کہ جن کے پاس ایم بی بی ایس کے بعد پوسٹ گریجوایشن کی اعزازی ڈگری موجود ہے۔ اعزازی ڈگری امتحان دیئے بغیر ہی حاصل کی گئی ہے۔ پی ایم ڈی سی نے اب اعزازی ڈگری ہولڈرز ڈاکٹروں پر یہ پابندی عائد کردی ہے کہ وہ کسی بھی میڈیکل یا ڈینٹل کالج میں ٹیچنگ فیکلٹی کے طور پر کام نہیں کرسکیں گے۔ اگر کسی ادارے نے ایسے ڈاکٹروں کو تعینات کیا ہے اور ان کی تعیناتی اب منسوخ کردی گئی ہے۔ پاکستان میڈیکل اینڈ ڈینٹل کونسل نے اعزازی طور پر حاصل کی جانے والی ان پوسٹ گریجوایٹ ڈگریوں کی رجسٹریشن پر بھی پابندی عائد کردی ہے۔