لندن (نیٹ نیوز) برطانوی وزیراعظم ٹریزامے نے انکشاف کیا ہے کہ جب ان کو الیکشن کے نتائج کا علم ہوا جس سے بات واضح ہوئی کہ وہ اکثریت کھو بیٹھیں گی تو میرے آنسو نکل آئے، انہوں نے بتایا کہ ان کے شوہر نے ان کو خبر سنائی اور یہ خبر ان کیلئے ایک دھچکا تھی، انہوں نے بی بی سی ریڈیو فائیو سے بات کرتے ہوئے کہا کہ مجھے اس خبر کو سمجنے میں کچھ دیر لگی کیونکہ ہم ایسے نتیجے کی توقع نہیں کررہے تھے، میرے شوہر نے مجھے گلے سے لگایا اور میں کچھ دیر روئی، برطانوی وزیراعظم نے بتایا کہ انہوں نے خود الیکشن کے نتائج سے قبل آنے والے ایگزٹ پول نہیں دیکھے تھے کیونکہ میں ایسے معاملات میں تھوڑی توہم پرست ہوں، ٹریزامے نے کہا کہ ان کو معلوم ہے کہ ان کی مہم شاندار نہیں رہی لیکن ان کو جا اشارے مل رہے تھے وہ یہ تھے کہ پارلیمنٹ میں پارٹی کی سیٹوں میں اضافہ ہوگا، واضح رہے کہ الیکشن سے قبل کنزرویٹو جماعت کو لیبر پر 20پوائنٹس کی برتری حاصل تھی لیکن انتخابات میں نہ صرف یہ برتری کھودی بلکہ 22سیٹیں بھی کھو دیں، الیکشن کے بعد نتائج پر رد عمل پر پہلی بار بات کرتے ہوئے برطانوی وزیراعظم نے کہا کہ کچھ دیر تو وہ سکتے میں تھیں اور پھر انہوں نے کنزرویٹو جماعت کے ہیڈ کوارٹر فون کرکے دریافت کیا، انہوں نے کہا کہ جن لوگوں کے ساتھ سالوں کام کیا تھا ان کو اپنی نشتیں ہارتے ہوئے دیکھ کر بہت افسوس ہوا، میں نے مستعفیٰ ہونے کے بارے میں نہیں سوچا کیونکہ مجھے لگا کہ یہ ذمہ داری ہے کہ اس بات کو یقینی بنایا جائے کہ ملک میں حکومت قائم رہے، جب ان سے پوچھا گیا کہ کیا ان کو انتخابات کااعلان کرنے پر پچھتاوا ہے تو انہوں نے کہا کہ نہیں کیونکہ میرے خیال میں اس وقت ایسا کرنا صحیح تھا، تاہم انہوں نے کہا کہ کاش مہم کے دوران زیادہ مثبت پیغام عوام تک پہنچاتی اور نوجوانوں کے تحفظات کو درو کرتی۔
