یاسین ملک ایک برس کے دورا ن 20 مرتبہ گرفتار، 180روز زیر حراست

سرینگر (اے پی پی) مقبوضہ کشمیر میں جموں و کشمیر لبریشن فرنٹ نے بھارتی پولیس کی طرف سے پارٹی چیئرمین محمد یاسین ملک کی باربارکی\ گرفتاری کی شدید مذمت کرتے ہوئے کہا ہے کہ صرف گزشتہ ایک برس کے دورا ن انہیں 20 مرتبہ گرفتار کیا گیا اور قریباً180روز تک حراست میں رکھا گیا۔ کشمیر میڈیا سروس کے مطابق جموںوکشمیر لبریشن فرنٹ کے رہنما نور محمد کلوال نے سرینگر میں جاری ایک بیان میں کہا کہ جمہوریت کے دعویداروں نے مقبوضہ علاقے میں جمہوری قدروں کی دھجیاں بکھیر کر رکھ دی ہیں۔ انہوں نے کہا کہ کشمیریوں کی مبنی حق آواز کو دبانے کے لیے کرفیو اور پابندیاں لگائی جاتی ہیں جبکہ انٹرنیٹ اور موبابل فون سروسز بند کی جاتی ہیں۔ نور محمد کلوال نے پارٹی کارکن مشتاق احمد کی بھی بار بار گرفتاری کی شدید مذمت کرتے ہوئے کہا کہ بیگناہوں کو گرفتار کرنا، گھروں پر چھاپے مارکر چادر اور چار دیواری کی حرمت کو پامال اور مکینوں کو زدوکوب کرنا بھارتی پولیس کا محبوب مشغلہ بن چکا ہے۔