سینئر صحافی شریف فاروق کیلئے خبریں آفس میں دعائے مغفرت نامور صحافی ضیاشاہد اور کارکنوں کی شرکت

پشاور (سٹاف رپورٹر) تحریک پاکستان کے کارکن اور سینئر صحافی چیف ایڈیٹر روزنامہ اتحاد اور روزنامہ جہاد شریف فاروق قضائے الہیٰ سے انتقال کرگئے ہیں۔ صدر، وزیراعظم، وزراءوزیر مملکت اطلاعات و نشریات مریم اورنگزیب نے سینئر صحافی شریف فاروق کے انتقال پر گہرے دکھ اور غم کا اظہار کیا ہے۔ ہفتہ کو اپنے ایک تعزیتی پیغام میں انہوں نے کہا کہ شریف فاروق ہماری صحافت کا قابل فخر سرمایہ تھے اور وہ ہمیشہ درخشاں اور اعلی صحافتی روایات اور اقدار پر کاربند رہے۔مریم اورنگزیب نے کہا کہ شریف فاروق کے رخصت ہونے سے جو خلا پیدا ہواہے وہ آسانی سے پر نہیں ہو گا۔ انہوں نے کہا کہ وہ صحافت کے علاوہ تحریک پاکستان کے کارکن کے طور پر بھی ان کی گرانقدر خدمات کو ہمیشہ یاد رکھا جائے گا۔مریم اورنگزیب نے مرحوم کے خاندان سے ہمدردی کا اظہار اور لواحقین کے لیے صبر جمیل کی دعا کی۔ آل پاکستان نیوز پیپرز سوسائٹی کے صدر سرمد علی اور قائم مقام سیکرٹری جنرل سید محمد منیر جیلانی نے عہدیداران اور ایگزیکٹو کمیٹی کی جانب سے کہنہ مشق صحافی شریف فاروق کے انتقال پر تعزیت کا اظہار کیا ہے۔ مرحوم اے پی این ایس کے اعزازی رکن مجلس عاملہ تھے۔ مرحوم نے تحریک پاکستان میں بھی حصہ لیا اور ایک تجربہ کار صحافی اور کئی کتابوں کے مصنف بھی تھے۔ اے پی این ایس کے عہدیداران نے مرحوم کی اخباری صنعت کیلئے خدمات اور آزادی صحافت کیلئے کوششوں کو سراہتے ہوئے کہا کہ اخباری صنعت ایک تجربہ کار صحافی سے محروم ہو گئی۔ انہوں نے مرحوم کی مغفرت اور بلندی درجات کیلئے دعا کی اور سوگوار خاندان کے ساتھ دلی ہمدردی کا اظہار کیا۔