لندن میں 24 منزلہ رہائشی عمارت میں آگ لگنے سے 6 افراد ہلاک، 50 زخمی

لندن(ویب ڈیسک) برطانیہ کے دارالحکومت لندن میں 24 منزلہ عمارت میں آتشزدگی سے 6 افراد جھلس کر ہلاک اور 50 سے زائد زخمی ہوگئے۔برطانوی خبرایجنسی کے مطابق لندن کے لٹمرروڈ پرواقع 24 منزلہ رہائشی گرینفل ٹاور میں اچانک خوفناک آگ بھڑک اٹھی، جس نے دیکھتے ہی دیکھتے عمارت کو اپنی لپیٹ میں لے لیا۔میٹرو پولیس نے 6 افراد کی ہلاکت کی تصدیق کرتے ہوئے کہا ہے کہ متعدد افراد بدستور لاپتہ ہیں اور ہلاکتوں میں اضافے کا خدشہ ہے۔آگ کی شدت کو دیکھتے ہوئے ابتدائی طور پر فائر بریگیڈ کی 40 گاڑیاں پہنچیں، تاہم بعد میں اس میں اضافہ کردیا گیا۔ اب بھی 400 فائر فائٹر امدادی کاموں میں مصروف ہیں۔ عمارت کے زمین بوس ہونے کے خطرے کے پیش نظر پولیس عوام کو اس عمارت سے دور کر رہی ہے۔