عمرہ ویزہ کی آڑ میں ”را“ کا خوفناک منصوبہ, اداروں میں ہلچل !!!

لاہور (خصوصی رپورٹ) پاکستان اور سعودی عرب کے تعلقات کو خراب کرنے کیلئے بھارتی ایجنسی ”را“ اور دیگر غیرملکی ایجنسیوں نے پاکستان میں سعودی سفارتخانہ اور قونصلیٹ پر ٹریول ایجنٹ مافیا کے ذریعہ احتجاج کی آڑ میں توڑپھوڑ کا منصوبہ بنا لیا اور سوشل میڈیا پر ایک سازش اور منصوبہ بندی کے تحت یہ پراپیگنڈا کیا جا رہا ہے کہ سعودی ایمبیسی اور قونصلیٹ عمرہ کے ویزے جاری نہیں کر رہے تاکہ عمرہ زائرین میں نفرت پیدا کی جا سکے۔ غیرملکی ایجنسیوں کے ہاتھوں کھیلنے والا ٹریول ایجنٹ مافیا خود زائرین عمرہ سے کروڑوں روپے بٹور چکا اور اب سعودی ایمبیسی کا نام استعمال کر کے مزید لوٹ رہا ہے۔ مصدقہ ذرائع کے مطابق کراچی قونصلیٹ میں تین دنوں میں 36ہزار سے زائد عمرہ زائرین کے ویزے جاری کئے گئے اور پہلی دفعہ قونصلیٹ میں دن رات کام ہو رہا ہے۔ اسی طرح اسلام آباد ایمبیسی میں بھی ہزاروں زائرین کو عمرہ ویزے جاری کئے جا چکے ہیں تاہم ایجنٹ مافیا زائرین کو غلط اطلاعات فراہم کر رہا ہے۔ ذرائع کے مطابق جو ایجنٹ مافیا پاکستان اور سعودی عرب کے باہمی تعلقات اور حالات خراب کیلئے غیرملکی ایجنسیوں کے ہاتھوں کھیل رہے ہیں ان کے حوالے سے حساس اداروں نے کارروائی شروع کردی ہے اور میڈیا سے تعلق رکھنے والے چند افراد کو بھی اس حوالے سے چیک کیا جا رہا ہے جبکہ ایک ہمسایہ اسلامی ملک کی حمایتی لابی کے بعض افراد بھی اس میں ملوث ہیں۔