”افغانستان کیلئے کچھ بھی کرلیں وہ الزام تراشیوں سے باز نہیں آئیگا“ نامورتجزیہ کار ضیاشاہد کی چینل ۵ کے مقبول پروگرام میں گفتگو

لاہور (مانیٹرنگ ڈیسک) چینل ۵ کے تجزیوں و تبصروں پر مشتمل پروگرام ”ضیا شاہد کے ساتھ“ میں گفتگو کرتے ہوئے سینئر صحافی و تجزیہ کار ضیا شاہد نے کہا ہے کہ پاک افغان تعلقات کا ایک ریکارڈ ہے جس کے مطابق ہم کچھ بھی کر لیں،افغانستان نے پاکستان پر الزام تراشی ہی کرنی ہے۔ افغان صدر کا رویہ سمجھ سے بالاتر ہے۔ چند روز قبل جوائنٹ چیفس آف سٹاف کمیٹی کی سربراہی میں وفد افغانستان گیا تھا۔ پاکستان کوشش کرتا رہتا ہے کہ افغانستان تعاون کرے یہاں سے بھاگ کر جانے والے دہشتگردوں کو وہاں پناہ نہ ملے، ہماری چوکیوں پر دہشتگرد حملے نہ ہوں، حکومت جتنی کوشش کرتی ہے افغانستان اتنا ہی ہمارے خلاف جاتا ہے۔ بھارت کے ساتھ تعلقات انتہائی خراب ہونے کے باوجود ادھر سے دہشتگردی کا اتنا خطرہ نہیں جتنا افغان بارڈر سے ہے حالانکہ بھارت آئے روز کنٹرول لائن پر حملے کرتا ہے، جس کے نتیجے میں ہمارے غریب کسان اور مویشی مرتے رہتے ہیں۔ افغان صدر جتنی مرضی زیادتی و ناانصافی کر لیں، اب سمجھ جانا چاہئے کہ گھی سیدھی انگلی سے نہیں نکلے گا۔ بھارت کی جانب سے طلبہ وفد کو واپس بھیجنے کے سوال پر انہوں نے کہا کہ غیر ملکی فنڈز پر چلنے والی ان نام نہاد این جی اوز کے نجانے کیا عزائم ہیں۔ حساس اداروں کو ان کا کھوج لگانا چاہئے کہ یہ کون سے خیر سگالی وفد کو بیرون ممالک بھیجتے ہیں۔ بھارت میں متعصب حکومت ہے، جنہوں نے طے کر لیا ہے کہ مسلمانوں کے ووٹ نہیں لینے، ان شہریوں کو سمجھنا چاہئے جو بھارت کا ویزہ ملنے پر بغلیں بجاتے ہیں حالانکہ وہ لوگ ہمارے فنکاروں و گلوکاروں کو دھکے دے کر نکالتے ہیں، ہماری کرکٹ ٹیم وہاں کھیل نہیں سکتی، ایسی صورتحال میں وہ وہاں کیا لینے جاتے ہیں۔ بھارت کون سا سوئٹزرلینڈ ہے، ہم سے زیادہ غربت وہاں ہے۔ ہمارے بھی 43 فیصد لوگ خط غربت کے نیچے زندگی بسر کرتے ہیں لیکن پھر بھی بھارت کی طرح یہاں کسی شہر میں بھی ہزاروں کی تعداد میں لوگ فٹ پاتھوں پر نہیں سوتے، بھارت کے بہت سے شہروں میں بڑی تعداد میں لوگ فٹ پاتھوں پر پیدا ہوتے ہیں، وہیں جوان اور پھر بوڑھے ہو کر مر جاتے ہیں۔ بھارت نے جن طلبہ کو واپس بھیجا ان کے ساتھ اچھا ہوا بلکہ ان کو جوتے بھی مارنے چاہئیں تھے، منہ کالا کرنا چاہئے تھا کہ یہ ہندو سٹیٹ ہے یہاں کیا کرنے آئے ہو۔ پاکستان اس واقعے پر جتنا مرضی احتجاج کر لے، کچھ نہیں ہو گا۔ انہوں نے کہا کہ ”را“ چیف کا اعتراف ایک طرف، ایک ایک کر کے اب سب لوگ ماننے کو تیار ہیں کہ کشمیری ان کے ساتھ نہیں ہیں۔ کشمیریوں کی جدوجہد ضرور رنگ لائے گی، وہ بھارت کے ساتھ نہیں رہنا چاہتے کیونکہ اس نے ان کی نسلوں کی نسلیں تباہ کرنے کی کوشش کی ہے، مظالم ڈھائے ہیں اور ابھی بھی ان کو جاری رکھے ہوئے ہے۔ شیخ عبداللہ جن کو کشمیری غدارِ اعظم کہتے تھے ان کے بیٹے غدار ابن غدار فاروق عبداللہ کا بھی اب ہر چوتھے دن بیان آتا ہے کہ مسلمانوں نے طے کر لیا ہے۔ اب انڈیا کو سوچنا پڑے گا کہ کشمیری اب ان کے ساتھ نہیں رہیں گے۔ انہوں نے کہا کہ اکرم شیخ کا فارن فنڈنگ کے الزام پر سیاسی جماعت پر پابندی کے کیس کا جب فیصلہ آئے گا تو تب دیکھیں گے لیکن وہ یہ بتائیں کہ اگر واقعی پابندی لگ جائے تو کیا کوئی جماعت باقی بچے گی۔ یہاں سے پیسہ لے جا کر باہر سرمایہ کاری کرنے والوں پر پابندی لگنی چاہئے، دیکھتے ہیں کہ کون کون سے لوگ اس کا شکار ہوتے ہیں۔ انہوں نے کہا کہ یہی پیپلزپارٹی تھی جو تحریک انصاف کے دھرنے کے موقع پرکہتی تھی کہ جمہوریت بچانے کیلئے نوازشریف کے ساتھ کھڑے ہیں۔ اب انہی کی حکومت پر الزامات لگا رہے ہیں۔ پی پی کے ان دونوں کرداروں کو عام آدمی سمجھنے کی کوشش کر رہا ہے۔ یہ بھٹو کی پیپلزپارٹی نہیں کہ عوام اپنا پیٹ کاٹ کر پارٹی پرچم خریدیں گے۔ اب وہ دور نہیں ہے ۔اس زمانے میں بھٹو کے نعروں و پروگراموں میں عوام کی دلچسپی تھی لیکن بدقسمتی سے پی پی کو 3 ادوار ملے مگر بھٹو کے وعدے پورے نہیں کئے گئے، اب انہیں میرٹ پر بات کرنی چاہئے اگر کچھ کام کیا ہے تو ٹھیک ورنہ عوام پوچھیں گے تو انہیں جواب دینا ہو گا۔ دفاعی تجزیہ کار لیفٹیننٹ جنرل (ر) نعیم خالد لودھی نے کہا ہے کہ افغان صدر کا پاکستان کی دعوت کو مسترد کرنا ٹھیک نہیں، موجودہ افغان حکومت عوام کی نمائندہ حکومت نہیں ہے۔ این ڈی ایس کو”را“ چلا رہی ہے، افغانستان میں امریکہ کی من پسند حکومت ہے جو اپنی مرضی کے لوگ لے کر آتے ہیں اور اپنی کرپشن کی وجہ سے ان کی باتیں سنتے ہیں۔ اس لئے ان کو کرپشن کی اجازت دی جاتی ہے تا کہ وہ ان کے ہاتھ میں رہیں۔ افغانستان حکومت و عوام کو الگ الگ تصور کرنا چاہئے، آدھے سے زیادہ علاقہ افغان حکومت کے کنٹرول میں نہیں۔ وہاںافراتفری ہے، کوئی حکومت نہیں صرف امریکہ و بھارت کا اثرورسوخ ہے۔ ان کی زبان بھارت دشمن والی زبان ہے لہٰذا ان کے بیانات پر زیادہ خائف ہونے کی ضرورت نہیں۔