طارق فاطمی کا وزیراعظم،دفترخارجہ کے نام خط, اندرونی کہانی منظر عام پر آگئی

اسلام آباد(نامہ نگار خصوصی )وزیراعظم نوازشریف کے سابق معاون خصوصی طارق فاطمی نے دفتر خارجہ میں الوداعی تقریب سے انتہائی جذباتی خطاب کیا جبکہ اس موقع پر دفتر خارجہ کے افسروں نے طارق فاطمی کا کھڑے ہو کر استقبال کیاکہ تقریب میں خطاب کرتے ہوئے طارق فاطمی کا کہناتھا کہ پورے کیرئر میں کوئی سرکاری معاملہ لیک نہیں کیا ،سفارتکار کی حیثیت سے حساس امور کی اہمیت جانتاہوں۔ان کا کہناتھا کہ وہ اپنی بے گناہی ثابت کرنے کیلئے کسی بھی پلیٹ فارم پر پیش ہونے کیلئے تیار ہیں واضح رہے کہ ڈان لیکس کمیٹی کی سفارشات کے پیش نظر طارق فاطمی اور را? تحسین کو عہدے سے برطرف کرنے کا نوٹیفکیشن جاری کر دیا گیاہے۔ وزیر اعظم کے سابق معاون خصوصی طارق فاطمی نے ڈان لیکس سکینڈل میں خود پر لگائے ہوئے الزامات کو مسترد کر دیا ہے اور کہا ہے کہ مجھ پر جو الزامات عائد کئے گئے ہیں ان کی تحقیقات میں حکومت اور اداروں سے ہر قسم کا تعاون کرنے کو تیار ہوں ۔ میڈیا رپورٹس کے مطابق طارق فاطمی نے وزیر اعظم نواز شریف کے نام ایک خط میں اپنے اوپر لگائے گئے الزامات کو مسترد کر دیا ہے اور مدت کے دوران تعاون پر نواز شریف کا شکریہ بھی ادا کیا ہے ۔انھوں نے الزامات پر افسوس کا اظہار کیا ہے اور کہا ہے کہ وہ تحقیقات میں حکومت اور اداروں سے ہر قسم کا تعاون کرنے کو تیار ہیں اور حکومت کے ساتھ بھی تعاون جاری رکھیں گے۔طارق فاطمی نے دفتر خارجہ کے عملے کے نام بھی ایک الوداعی خط لکھا ہے جس میں انھوں نے کہا ہے کہ ‘میں خود پر لگائے جانے والے تمام الزامات کو مسترد کرتا ہوں، یہ الزامات ایک ایسے شخص کے لیے تکلیف کا باعث ہیں جو پانچ دہائیوں سے پاکستان کی خدمت کررہا ہو’۔ہیڈکوارٹرز کے تمام افسران کے نام لکھے گئے مذکورہ خط میں طارق فاطمی کا مزید کہنا تھا، ‘ان سالوں میں مجھے قومی سلامتی کے معاملات سے جڑے کئی حساس معاملات کو دیکھنا پڑا جن میں کچھ بہت اہم معلومات سے آگاہی بھی شامل تھی’۔اپنے ساتھ تعاون کرنے پر سب کا شکریہ ادا کرتے ہوئے طارق فاطمی نے مزید لکھا، ‘ملک کو لاحق مختلف چیلنجز کے باوجود قومی مفاد کی بہتری اور تحفظ کے لیے حاصل کی گئی کامیابیوں کو بعض اوقات گھر پر اچھی طرح سمجھ کر سراہا نہیں جاتا تاہم بین الاقوامی سطح پر حاصل ہونے والی تعظیم، اپنے کام سے محبت اور ذاتی سالمیت کی گواہی ہوتی ہے۔