کراچی(ویب ڈیسک)پاکستان پیپلز پارٹی کے رہنمامولا بخش چانڈیو نے جوابی وار کرتے ہوئے کہاکہ وزیر مملکت خود نواز شریف کو عزیر بلوچ اور ذوالفقار مرزا کی سطح پر لے آئے، کیا اب وزیراعظم ایک عام کرمنل کی طرح جے آئی ٹی کے سامنے پیش ہوں گے ۔ہفتہ کو وزیر مملکت برائے پانی وبجلی کی جانب سے سابق صدر آصف زرداری کے خلاف بیان پر مولا بخش چانڈیو نے ردعمل دیتے ہوئے کہا کہ ن لیگ کے وزرا کے بھڑکنے کے دن ہیں کیونکہ سپریم کورٹ کے فیصلے کے بعد یہ لوگ فرسٹریشن کا شکار ہیں ۔مولا بخش چانڈیو کا کہنا تھا کہ عابد شیر علی نے خود نواز شریف کو عزیر بلوچ اور ذوالفقار مرزا کی سطح پر لاکھڑا کیا ہیں، میرا سوال یہ ہے کہ کیا وزیراعظم ایک عام کرمنل کی طرح پاناما کیس کی جے آئی ٹی کے سامنے پیش ہونگے یہ وہی نواز شریف ہیں جنہوں نے شہید بینظیر بھٹو کو عدالتوں کے چکر کٹوائے مگر ایک بھی الزام بھی سچ ثابت نہیں کرسکے، ان کا مزید کہنا تھا کہ وفاقی وزرا کی بد زبانی نواز شریف کو بے گناہ ثابت نہیں کرسکتی۔
