”ججز کہہ چکے فیصلہ صدیوں یاد رکھا جائیگا مطلب یہ کے فیصلے سے کوئی بڑی تبدیلی آسکتی ہے“ نامورتجزیہ کار ضیاشاہد کی چینل ۵ کے مقبول پروگرام میں گفتگو

لاہور (مانیٹرنگ ڈیسک) چینل فائیو کے تجزیوں و تبصروں پر مشتمل پروگرام ”ضیاشاہد کے ساتھ“ میں گفتگو کرتے ہوئے سینئر صحافی و تجزیہ کار ضیاشاہد نے کہا ہے کہ پانامہ کیس سے متعلق جج صاحبان متعدد بار کہہ چکے ہیں کہ فیصلہ تاریخی نوعیت کا ہوگا اور ہمیشہ یاد رکھا جائے گا۔ یقیناً فیصلے میں یہ طے پائے گا کہ آئین کی تاریخ میں کون دیانتدار ہے اور کون نہیں اس کو واضح کر دیا جائے گا۔ آئین کے آرٹیکل 63,62 کے حوالے سے بڑی تبدیلی سامنے آنے والی ہے۔ انہوں نے کہا کہ تمام سیاسی جماعتیں اور فوج بھی یہ کہہ چکی ہے کہ جو بھی فیصلہ آئے گا قبول کرینگے۔ فیصلہ نون لیگ کے خلاف آئے یا حق میں وہ فوری انتخابات کی طرف جاتی دکھائی نہیں دے رہی۔ اگر فیصلہ خلاف آتا ہے تو نواز لیگ کوئی نیا پارلیمانی لیڈر منتخب کر کے اپنی حکومت کو 2018 تک طول دے گی کیونکہ مجھے خود کیبنٹ کے ارکان سے ہونے والی ملاقاتوں میں بتایا جاتا رہا ہے کہ اس وقت سب سے بڑا مسئلہ لوڈشیڈنگ کا ہے، تخمینے میں یہی ہے کہ بجلی پیدا کرنے کےلئے شریف خاندان کے یا سرکاری سطح پر جتنے بھی پروجیکٹس بنائے جا رہے ہیں وہ 2018ءکے انتخابات سے 3 ماہ قبل بجلی پیدا کرنا شروع کر دینگے۔ اس لئے حکومتی پارٹی کی کوشش ہو گی کہ انتخابات ایسے وقت میں کرائے جائیں جب لوڈشیڈنگ کا مسئلہ حل ہو جائے۔ انہوں نے کہا کہ ماضی میں آصف زرداری پر نواز شریف کو سپورٹ کرنے کے الزامات لگتے رہے، وہ جوڑ توڑ کے ماہر ہیں۔ لیکن اس کے باوجود پی پی سمیت تمام اپوزیشن پارٹیاں کوشش کریں گی کہ لوڈشیڈنگ کا مسئلہ حل ہونے سے پہلے ہی انتخابات ہو جائیں کیونکہ ایسے وقت میں انتخابی نتائج حکومت کے حق میں نہیں آئیں گے۔ اس سے پہلے ق لیگ 2008ءاور پی پی 2013ءمیں لوڈشیڈنگ کی وجہ سے الیکشن ہار چکی ہیں۔ انہوں نے کہا کہ مجھے ٹیکنیکل حضرات نے بتایا ہے کہ آج بھی 22, 21 ہزار میگا واٹ بجلی پیدا کرنے کی صلاحیت موجود ہے جبکہ طلب 18,17 ہزار میگا واٹ ہے۔ اس پر کہا جاتا ہے کہ پیسے نہیں ہیں۔ امپورٹ زیادہ ہونے کی وجہ سے قومی آمدن میں کمی ہو گئی ہے۔ آئی پی پیز کو دینے کےلئے پیسے نہیں ہیں۔ بجلی پیدا کرنے والے کارخانوں، صنعتوں نے بھی اپنی ڈیمانڈ بڑھا دی ہے، وہ کہتے ہیں کہ ایندھن مہنگا ہونے کی وجہ سے اخراجات بڑھ گئے ہیں لیکن حکومت بھرپور کوشش کرے گی کہ آنے والے رمضان میں کسی طرح آئی پی پیز کو پیسے دیکر عوام کو بجلی فراہم کرے۔ مردان یونیورسٹی میں مشال خان کے قتل سے دنیا بھر میں پاکستان کا سافٹ امیج متاثر ہوا علماءکو چاہیے کہ وہ اس واقعہ کے خلاف احتجاج کریں۔