لاہور(کرائم رپورٹر)شادباغ کے علاقہ میں انسانیت سوز واقع، سگی ماں نے معصوم بیٹے اور بیٹی کو قتل کر کے خود کشی کر لی، 4سالہ بیٹے کا گلا دبا کر اسے قتل کیا جبکہ 2سالہ بیٹی کو پانی کے ٹب میں ڈبو کر موت کے گھاٹ اُتارنے کے بعد بازو کی نس کاٹ کر خودکشی کر لی۔ پولیس نے نعشیں پوسٹ مارٹم کیلئے مردہ خانے منتقل کرتے ہوئے تفتیش شروع کردی۔ بتایا گیا ہے کہ شادباغ کے علاقہ کوٹ خواجہ سعید کے محلہ عیسیٰ نگری میں ایک ایسا افسوس ناک واقع رونما ہوا کہ انسانیت بھی شرما گئی۔ شہری سیمسن عرف سیم مسیح کی بیوی 30سالہ کرن بی بی نے شوہر کیساتھ آئے روز کے لڑائی جھگڑوں سے تنگ آکر گزشتہ روز اپنے ننھے بچوں 4سالہ میتھیو اور2سالہ ایمان کو قتل کر کے خودکشی کر لی۔ پولیس کے مطابق کرن بی بی کا خاوند سیمسن مقامی ریسٹورنٹ میں ملازمت کرتا ہے اور گزشتہ روز میاں بیوی میں جھگڑا ہو گیا جس کے بعد سیمسن اپنے کام پر چلا گیا اور کرن نے پہلے 3سالہ بیٹی ایمان کو پانی میں ڈبو کر ہلاک کیا اور 4سالہ میتھیو کا گلا دبانے کے بعد بازو کی نسیں کاٹ کر خودکشی کرلی۔ واقعہ کی اطلاع ملتے ہی پولیس کی بھاری نفری جائے وقوعہ پر پہنچ گئی جنہوں نے تینوں نعشیں قبضہ میں لے کر پوسٹ مارٹم کیلئے مردہ خانے منتقل کر دیں۔ پولیس کا کہنا ہے موقع سے شواہد اکٹھے کر لئے گئے ہیں جن کو فرانزک لیب منتقل کردیا گیا ہے تاہم پوسٹ مارٹم اور فرانزک رپورٹ کے بعد ہی اصل حقائق منظر عام پر آئیں گے۔ پولیس کا کہنا ہے کہ بظاہر چونکہ واقع خودکشی کے علاوہ کچھ بھی نہیں دکھائی دے رہا اسی لئے مزید کسی کو بھی شامل تفتیش نہیں کیا گیا۔ واقعہ کے بعد علاقہ میں شدید خوف ہراس اور غم کی لہر قائم ہے جبکہ ننھے پھولوں کی دردناک موت سے علاقہ کی ہر آنکھ اشک بار دکھائی دیتی ہے ۔
