لاہور (کرائم رپورٹر) ظلم و بربریت کی انتہا، کونسلر حنیف نے سوئے مارکر نویں جماعت کے طالبعلم کی دونوں آنکھیں نکال دیں، دونوں آنکھوں سے محروم محمد عیش انصاف کیلئے سیشن کورٹ پہنچ گیا۔ بتایا گیا ہے کہ نویں جماعت کا طالبعلم محمد عیش بینائی سے محروم ہے اور یہ محرومی قدرتی نہیں بلکہ حنیف نامی ظالم شخص نے اسے آنکھوں سے محروم کیا۔ متاثرہ طالبعلم نے ملزم کیخلاف سیشن کورٹ میں درخواست دائر کی ہے جس میں اس نے موقف اختیار کیا ہے کہ حنیف نے سوئے مار کر اس کی آنکھیں ضائع کردی ہیں لہذا اس کی ضمانت خارج نہ کی جائے۔ طالبعلم کے مطابق ملزم نے اسے زخمی کرکے دریائے راوی کے کنارے پھینک دیا جب کہ آنکھوں پر زخم آنے سے وہ بینائی سے بھی محروم ہوچکا ہے۔ بچے کی والدہ کہتی ہیں کہ ملزمان نے اس کے بیٹے کی زندگی برباد کر دی، ظالموں سے کوئی رعایت نہ برتی جائے۔ طالبعلم کے والد جاوید کا کہنا ہے کہ اس کا بیٹا پڑھنے کے لیے گھر سے گیا تھا جسے ملزمان نے اغواءکر کے تشدد کیا اور شدید زخمی کرکے دریا میں پھینک دیا تھا۔ محمد عیش کے والدین اپنے لخت جگر کی بے نور آنکھوں کو دیکھ کر بے حد پریشان ہیں، انہوں نے اعلیٰ حکام سے اپیل کی ہے کہ ملزمان کوسخت سزا دلائی جائے۔
