وزیراعظم کی بڑے شہر میں آمدپر زبردست استقبال,”سونے “کا تاج پہنایا گیا

حیدر آباد (صباح نیوز/اے پی پی) حیدر آباد کے ایک مقامی تاجر کی طرف سے وزیراعظم کو حیدر آباد آمد پر سونے کا تاج پہنایا گیا۔ میڈیا رپورٹس کے مطابق پیرکے روز وزیر اعظم میاں نواز شریف حیدر آباد پہنچے تو ان کا زبردست استقبال کیا گیا اس دوران انہیں انتہائی دیدہ زیب سونے کا تاج پہنایا گیا۔ واضح رہے کہ وزیراعظم نواز شریف حیدرآباد میں مسلم لیگ (ن) کے ورکرز کنونشن میں شرکت کے لیے حیدرآباد پہنچے تھے۔ وزیراعظم محمد نواز شریف کا کارکنوں نے زبردست نعرے بازی سے استقبال کیا۔ پیر کو حیدر آباد میں ورکرز کنونشن سے خطاب کے لئے وزیراعظم ڈائس پر آئے تو دیکھو دیکھو کون آیا، شیر آیا، شیر آیا کے نعروں سے ہال گونج اٹھا، کارکنوں نے پرجوش نعرے بازی کی اور نشستوں پر کھڑے ہوکر وزیراعظم کا استقبال کیا۔ اس موقع پر وزیراعظم نے کارکنوں کے جوش و جذبہ کو سراہتے ہوئے کہا کہ ان کے پاس اس جوش و جذبہ کی تعریف کے لئے الفاظ نہیں ہیں۔ وزیراعظم کی تقریر کے دوران بھی بار بار پرجوش نعرے بازی ہوتی رہی۔ نواز شریف تیرے جانثار، بے شمار بے شمار اور دیکھو دیکھو کون آیا، شیر آیا، شیر آیا کے نعروں سے ہال گونجتا رہا۔ وزیراعظم نے حیدر آباد میں یونیورسٹی بنانے، ترقی کے لئے 50 کروڑ روپے دینے سمیت مختلف اعلانات کئے تو ہال تالیوں اور نعروں سے گونج اٹھا۔ وزیراعظم نے پاکستان زندہ باد کے نعرے سے اپنی تقریر کا اختتام کیا۔