چودھری نثار گزشتہ حکومت کا ”گند“ صاف کرنے میں مصروف, اہم شخصیت کا حیران کُن بیان

اسلام آباد (نامہ نگار خصوصی) وزیرمملکت برائے اطلاعات و نشریات و قومی ورثہ مریم اورنگزیب نے کہا ہے کہ کرپشن کرنے والے چوہدری نثار سے خوفزدہ ہیں، چوہدری نثار ملک کے وزیر داخلہ ہیں اور ان کی سچائی دیانت اور کردار پر سوال اٹھانے سے پہلے گریبان میں جھانکیں،شرجیل میمن شور مچا کر اپنی چوری اور کرپشن نہیں چھپا سکتے، شرجیل میمن لوگوں کی لوٹی ہوئی دولت کا جواب دیں اور قوم کی لوٹی ہوئی دولت واپس کریں۔ گزشتہ روز اپنے ایک بیان میں انہوں نے کہا کہ شرجیل میمن صاحب شور مچا کر اپنی چوری اور کرپشن نہیں چھپا سکتے ،چوہدری نثار پر پاکستانی قوم نے اعتماد کر کے وزیر داخلہ بنایا ہے۔ انہوں نے کہا کہ شرجیل میمن صاحب قوم کو جواب دیں چوری اور کرپشن کیوں کی ،چوہدری نثار وہ نام ہے جو وزیراعظم کے وژن کے مطابق پاکستان کو دہشت گردی سے پاک کر رہے ہیں ۔مریم اورنگزیب نے کہا کہ چوہدری نثار وہ ہیں جو آپ کی پچھلے دور کی کرپشن کا گند صاف کر رہے ہیں۔انہوں نے کہا کہ شرجیل میمن صاحب آپ جتنا شور مچا لیں آپ چوہدری نثار کے احتساب سے نہیں بچ سکتے، جواب تو دینا ہو گا،شرجیل میمن صاحب لوگوں کی لوٹی ہوئی دولت کا جواب دیں اور قوم کی لوٹی ہوئی دولت واپس کریں۔