یہ اینٹی کرپشن ٹربیونل نہیں بلکہ جرگہ ہے

لاہور(سپورٹس رپورٹر) پاکستان سپر لیگ کے اسپاٹ فکسنگ کیس میں معطل کیے جانے والے کرکٹر خالد لطیف نے پاکستان کرکٹ بورڈ (پی سی بی) ٹریبونل کی کارروائی کے بائیکاٹ کا اعلان کردیا۔کرکٹر خالد لطیف اور ان کے وکیل بدر عالم نے سپاٹ فکسنگ سکینڈل کیس کی سماعت کا بائیکاٹ کرتے ہوئے اس کارروائی کو جانبدارانہ قرار دیدیا ،کہتے ہیں یہ اینٹی کرپشن ٹربیونل نہیں بلکہ جرگہ ہے کیونکہ تنظیمی کمیٹی کے سربراہ ہی ٹربیونل کے انچارج بھی ہیں۔اسپاٹ فکسنگ کیس کی سماعت کے بعد میڈیا سے بات کرتے ہوئے خالد لطیف کے وکیل بدر عالم نے کہا کہ ’آج ہم نے ایک درخواست دائر کی کہ ہمیں 19 مئی کی ٹریبونل میں سماعت کی ویڈیو ریکارڈنگ دی جائے، ہم نے ایک اور استدعا کی کہ جب تک کرکٹ بورڈ کا ڈسپلنری پینل ٹریبونل کے چیئرمین سے متعلق کوئی فیصلہ نہیں کرلیتا ہم کارروائی میں شریک نہیں ہوں گے۔‘انہوں نے کہا کہ ’اس فیصلے کا مطلب یہ نہیں کہ ہم کارروائی سے بھاگ رہے ہیں، ہم قانونی بات کر رہے ہیں، کسی پچھلی سماعت کی ریکارڈنگ لینا ہمارا حق ہے لیکن ٹریبونل نے ہماری استدعا یہ کہہ کر مسترد کردی کہ وہ ریکارڈنگ ہمارے ذاتی استعمال کے لیے ہے۔‘بدر عالم کا کہنا تھا کہ ’ہم 19 مئی کی سماعت کی ریکارڈنگ حاصل کرکے اسے میڈیا کو دکھانا چاہتے ہیں کہ ہمارے ساتھ اس دن بدسلوکی کی گئی، جب ہم یہ کہہ رہے ہیں کہ ٹریبونل کے چیئرمین اور ممبران کو اس سماعت کا حق نہیں ہے تو انہیں خود اس کارروائی کو روکنا چاہیے، ہمارا یہ اصولی موقف ہے کہ جو شخص پی سی بی کا قانونی مشیر رہا ہو وہ بورڈ کا جج نہیں بن سکتا۔‘انہوں نے کہا کہ ’ٹریبونل آئین کے مطابق نہیں بلکہ جرگہ رولز کے تحت سماعت کر رہا ہے، ہم نے اب تک سماعت میں شرکت بطور احتجاج کی ہے، لیکن اب ہم ٹریبونل کی سماعت میں تب شریک ہوں گے جب ہمیں یہ نوٹس موصول ہوگا کہ چیئرمین ٹریبونل سے متعلق ڈسپلنری کمیٹی نے کوئی فیصلہ کرلیا ہے۔‘